తిరుమల భక్తులకు టీటీడీ చైర్మన్ బీఆర్ నాయుడు కీలక సందేశం

దిశ, వెబ్ డెస్క్: తిరుమలకు వస్తున్న శ్రీవారి భక్తులకు టీటీడీ చైర్మన్ బీఆర్ నాయుడు (TTD Chairman BR Naidu) కీలక సందేశం జారీ చేశారు. తిరుమల కొండపై వివిధ దర్శనాల పేరుతో కొంతమంది భక్తులను మోసం చేస్తున్నారని ఫిర్యాదులు వచ్చాయి. దీంతో బీఆర్ నాయుడు ఎక్స్ వేదికగా స్పందిస్తూ.. "తిరుమల ఆలయంలో అత్యంత ప్రజాదరణ పొందిన VIP బ్రేక్ దర్శనం, ఆర్జిత సేవలను బుక్ చేసుకోవడానికి సహాయం చేస్తూ మోసపూరితంగా భక్తులను వలలో వేసుకోవడానికి అనేక మంది దళారీలు, మధ్యవర్తులు వివిధ రకాల పద్ధతుల్లో పాల్గొంటున్నట్లు నా దృష్టికి వచ్చింది.

ఈ దళారీలలో కొందరు TTD కార్యాలయాలలో, కొంతమంది మంత్రులు, ఎన్నికైన ప్రతినిధుల పేషీలలో పనిచేస్తున్న అధికారులుగా నటిస్తున్నారు. ఈ మధ్యవర్తులు పెద్ద మొత్తంలో డబ్బులు వసూలు చేసి భక్తులను మోసం చేసిన అనేక సందర్భాలు కూడా బయటపడ్డాయి. ఈ నేపథ్యంలో తిరుమల తిరుపతి దేవస్థానాల అధికారిక వెబ్‌సైట్ ద్వారా మాత్రమే తమ దర్శన టిక్కెట్లను బుక్ చేసుకోవాలని, దర్శనం, వసతి కోసం ఏ మధ్యవర్తులను సంప్రదించవద్దని భక్తులందరికీ బీఆర్ నాయుడు విజ్ఞప్తి చేశారు. అలాగే భక్తులను మోసం చేస్తున్న దళారీలను గుర్తించి వారిపై చట్టబద్ధంగా చర్యలు తీసుకోవడానికి TTD ప్రత్యేక డ్రైవ్‌ను కూడా ప్రారంభించిందని, మధ్యవర్తులు తమను సంప్రదించినప్పుడల్లా TTD విజిలెన్స్, పోలీసు శాఖను సంప్రదించాలని కూడా భక్తులను ఆయన అభ్యర్థించారు.