ఈవీ వాహనానికి ఛార్జింగ్ పెట్టి పడుకున్న కుటుంబం.. తెల్లారేసరికి ఏడుగురు సజీవదహనం
మధ్యప్రదేశ్లోని ఇండోర్ నగరంలో తెల్లవారుజామున పెను విషాదం చోటుచేసుకుంది.
దిశ, వెబ్డెస్క్: మధ్యప్రదేశ్లోని ఇండోర్ నగరంలో తెల్లవారుజామున పెను విషాదం చోటుచేసుకుంది. బ్రిజేశ్వరి అనెక్స్ నివాస ప్రాంతంలోని ఒక బహుళ అంతస్తుల భవనంలో భారీ అగ్నిప్రమాదం సంభవించి, ఏడుగురు ప్రాణాలు కోల్పోయారు. ఇండోర్ పోలీస్ కమిషనర్ సంతోష్ కుమార్ సింగ్ తెలిపిన ప్రాథమిక వివరాల ప్రకారం.. ఇంటి వెలుపల ఒక ఎలక్ట్రిక్ వాహనాన్ని (EV) ఛార్జింగ్ పెట్టిన సమయంలో ఛార్జింగ్ పాయింట్ వద్ద పేలుడు సంభవించింది. ఆ మంటలు వేగంగా భవనానికి అంటుకున్నాయి. దురదృష్టవశాత్తూ, ఆ ఇంట్లో నిల్వ ఉంచిన 10కి పైగా గ్యాస్ సిలిండర్లు ఒకదాని తర్వాత ఒకటి పేలడంతో మంటల తీవ్రత ఊహించని స్థాయికి పెరిగింది.
పాలిమర్ కెమికల్స్ వల్ల పెరిగిన మంటలు..
ఈ భవనం మనోజ్ పుగాలియా అనే వ్యక్తికి చెందినది. ఆయన పాలిమర్ వ్యాపారం చేస్తుండటంతో, ఇంట్లోనే పెద్ద ఎత్తున మండే స్వభావం ఉన్న కెమికల్స్ను నిల్వ ఉంచారు. ఇవి కూడా తోడవడంతో మంటలు క్షణాల్లో భవనం మొత్తాన్ని చుట్టేసి నివాసితులను బందీలుగా మార్చాయి. పోలీసులు, అగ్నిమాపక సిబ్బంది ఘటనా స్థలానికి చేరుకోకముందే స్థానికులు సాహసించి ముగ్గురిని సురక్షితంగా బయటకు తీశారు. అనంతరం రంగంలోకి దిగిన ఎన్డీఆర్ఎఫ్ (NDRF), ఫైర్ టెండర్లు గంటల తరబడి శ్రమించి మంటలను అదుపులోకి తెచ్చాయి. "ఇప్పటివరకు ఏడుగురు మరణించారు. రెండు అంతస్తులను క్లియర్ చేశాం, మూడవ అంతస్తులో గాలింపు చర్యలు కొనసాగుతున్నాయి" అని ఇండోర్ జిల్లా మేజిస్ట్రేట్ (DM) శివమ్ వర్మ వెల్లడించారు.
కన్నీరుమున్నీరవుతున్న కుటుంబాలు..
తెల్లవారుజామున గాఢ నిద్రలో ఉండగా జరిగిన ఈ ప్రమాదంతో బాధితులు తేరుకునే లోపే ప్రాణాలు కోల్పోయారు. మృతుల వివరాలను సేకరిస్తున్నామని, దర్యాప్తు కొనసాగుతోందని అధికారులు తెలిపారు. ఇరుకైన సందులు, జనసాంద్రత ఉన్న ప్రాంతం కావడంతో సహాయక చర్యలకు కొంత ఆటంకం ఏర్పడింది.
