ఏఎంబీ ఫ్లైఓవర్పై ఘోర ప్రమాదం.. స్కూటీని ఢీకొట్టిన బుల్లెట్.. ఇద్దరు అక్కడికక్కడే మృతి!
గచ్చిబౌలి AMB ఫ్లైఓవర్పై ఘోర ప్రమాదం.. రాంగ్ రూట్లో వచ్చిన స్కూటీని ఢీకొట్టిన బుల్లెట్.. ఇద్దరు అక్కడికక్కడే మృతి, ఒకరికి తీవ్ర గాయాలు!
దిశ, వెబ్ డెస్క్: హైదరాబాద్ నగరంలోని ఐటీ కారిడార్లోని గచ్చిబౌలి ఏఎంబీ (AMB Mall) ఫ్లైఓవర్పై ఒక ఘోర రోడ్డు ప్రమాదం చోటుచేసుకుంది. ట్రాఫిక్ నిబంధనలను బేఖాతరు చేస్తూ ఫ్లైఓవర్పై రాంగ్ రూట్లో దూసుకొచ్చిన ఒక స్కూటీని, ఎదురుగా వస్తున్న బుల్లెట్ బైక్ బలంగా ఢీకొట్టింది. ఈ భయంకరమైన ప్రమాదంలో స్కూటీ పై ప్రయాణిస్తున్న శ్రీకాంత్, విఠల్ అనే ఇద్దరు వ్యక్తులు తీవ్ర రక్తస్రావమై అక్కడికక్కడే ప్రాణాలు కోల్పోయారు. అలాగే, బుల్లెట్ బైక్పై ఉన్న వినోద్ అనే వ్యక్తికి తీవ్ర గాయాలు కావడంతో, స్థానికులు, పోలీసులు కలిసి అతనిని తక్షణమే చికిత్స నిమిత్తం సమీపంలోని ఆసుపత్రికి తరలించారు. ప్రస్తుతం అతని పరిస్థితి విషమంగా ఉన్నట్లు తెలుస్తోంది.
ఈ ప్రమాద ఘటనపై స్థానిక ప్రజలు, ఐటీ ఉద్యోగులు తీవ్ర ఆగ్రహం వ్యక్తం చేస్తున్నారు. గచ్చిబౌలి, కొండాపూర్ పరిసరాల్లోని ఫ్లైఓవర్లపై సమయం ఆదా చేసుకోవాలనే నెపంతో నిత్యం అనేక వాహనాలు యథేచ్ఛగా రాంగ్ రూట్లో ప్రయాణిస్తుంటాయని స్థానికులు మండిపడుతున్నారు. ట్రాఫిక్ పోలీసులు ఇటువంటి ప్రమాదకరమైన డ్రైవింగ్లపై నిరంతరం నిఘా ఉంచి, కఠినమైన జరిమానాలు, చర్యలు తీసుకుని ఉంటే ఈరోజు ఇద్దరు అమాయకులు ప్రాణాలు కోల్పోయేవారు కాదని వారు ఆవేదన వ్యక్తం చేస్తున్నారు.
