ఆలయంలో వెంకటేశ్వరస్వామి కిరీటం మాయం: పరారీలో 31 మంది బోర్డు సభ్యులు
కృష్ణా జిల్లా గుడివాడ పట్టణంలోని ప్రసిద్ధ శ్రీ కల్యాణ వేంకటేశ్వరస్వామి దేవస్థానంలో తీవ్ర కలకలం రేగింది. స్వామివారికి అలంకరించే దాదాపు కోటి రూపాయల మార్కెట్ విలువ కలిగిన అత్యంత అమూల్యమైన బంగారు కిరీటం మాయమైంది.
దిశ, వెబ్డెస్క్: కృష్ణా జిల్లా గుడివాడ పట్టణంలోని ప్రసిద్ధ శ్రీ కల్యాణ వేంకటేశ్వరస్వామి దేవస్థానంలో తీవ్ర కలకలం రేగింది. స్వామివారికి అలంకరించే దాదాపు కోటి రూపాయల మార్కెట్ విలువ కలిగిన అత్యంత అమూల్యమైన బంగారు కిరీటం మాయమైంది. ఈ ఘోర అపచారం రాష్ట్రవ్యాప్తంగా భక్తుల మనోభావాలను తీవ్రంగా గాయపరచడంతో, దేవదాయ శాఖ (Endowments Department) ఈ వ్యవహారాన్ని సీరియస్గా తీసుకుని ఉన్నత స్థాయి విచారణకు శ్రీకారం చుట్టింది. మరోవైపు, స్వామివారి కిరీటం మాయమైన ఉదంతం వెలుగులోకి రాగానే ఆలయ పాలక మండలి (ట్రస్ట్ బోర్డు) సభ్యులు తీవ్ర ఒత్తిడికి గురయ్యారు. విచారణకు భయపడి ట్రస్ట్ బోర్డుకు చెందిన మొత్తం 31 మంది సభ్యులు తమ ఫోన్లు స్విచ్చాఫ్ చేసి గుట్టుచప్పుడు కాకుండా అజ్ఞాతంలోకి వెళ్ళిపోయారు. అంతేకాకుండా, వారు వెళ్తూ వెళ్తూ దేవస్థానం నిర్వహణ ట్రస్ట్ కార్యాలయానికి తాళాలు వేసి వెళ్లడం స్థానికంగా మరిన్ని అనుమానాలకు తావిస్తోంది.
రంగంలోకి దేవదాయ శాఖ అధికారులు..
ఈ దారుణ ఘటనపై సమాచారం అందుకున్న దేవదాయ శాఖ అసిస్టెంట్ కమిషనర్ లలిత హుటాహుటిన ఆలయ ప్రాంగణానికి చేరుకున్నారు. ఆలయ ప్రధాన అర్చకుడిని, ఇతర సిబ్బందిని ఆమె సుదీర్ఘంగా విచారించి వివరాలు సేకరించారు. దర్యాప్తులో భాగంగా ట్రస్ట్ కార్యాలయం తాళాలను తెరిపించిన అసిస్టెంట్ కమిషనర్ లలిత.. ఆలయ ఆస్తులు, నగలకు సంబంధించిన కీలక రికార్డులను, లావాదేవీల పుస్తకాలను ఒక ప్రత్యేక గదిలో భద్రపరిచి, ఆ గదికి తాళాలు వేయించారు. ఆ రికార్డులన్నింటినీ తమ ఆధీనంలోకి తీసుకుని క్షుణ్ణంగా పరిశీలిస్తున్నట్లు ఆమె తెలిపారు. గత ఏడాది ఒక వృద్ధ దాత కుటుంబం ఎంతో భక్తిశ్రద్ధలతో ఈ బంగారు కిరీటాన్ని స్వామివారికి కానుకగా సమర్పించింది. అయితే, ఇటీవల కాలంలో స్వామివారికి ఆ కిరీటాన్ని అలంకరించకపోవడంతో అనుమానం వచ్చిన దాతలు ఆలయ కమిటీని నిలదీశారు. మొదట లాకర్లలో ఉందని అబద్ధాలు చెప్పినప్పటికీ, గట్టిగా ప్రశ్నించడంతో తమ సొంత అవసరాల కోసం (ఆలయ పనుల నిమిత్తం) ఒక ప్రైవేట్ వ్యాపారి వద్ద రూ. 38 లక్షలకు ఆ కిరీటాన్ని అక్రమంగా తాకట్టు పెట్టినట్లు కమిటీ సభ్యులు అంగీకరించినట్లు తెలుస్తోంది. ఈ సున్నితమైన అంశంపై పూర్తి స్థాయి దర్యాప్తు జరిపి, నివేదికను ప్రభుత్వ ఉన్నతాధికారులకు సమర్పించనున్నట్లు అసిస్టెంట్ కమిషనర్ లలిత మీడియాకు వెల్లడించారు. భగవంతుడి సొత్తును సైతం పక్కదారి పట్టించిన నిందితులపై కఠిన చట్టపరమైన చర్యలు తీసుకోవాలని భక్తులు తీవ్రస్థాయిలో డిమాండ్ చేస్తున్నారు.
