తిరుమలలో మరో రోడ్డు ప్రమాదం

దిశ, డైనమిక్ బ్యూరో : తిరుమల ఘాట్ రోడ్లపై వరుసగా ప్రమాదాలు చోటు చేసుకుంటుండటం అందర్నీ కలవరపాటుకు గురి చేస్తున్నాయి. గత మూడు వారాలుగా వరుస ప్రమాదాలు చోటు చేసుకోవడం భక్తులు ఆందోళన వ్యక్తం చేస్తున్నారు. ఈ ప్రమాదాల నుంచి కోలుకోకముందే మరో ప్రమాదం జరిగింది. శుక్రవారం ఉదయం రెండో ఘాట్ రోడ్డులో తిరుపతి నుంచి తిరుమల వెళుతున్న ఓ టెంపో వాహనం కొండను ఢీకొట్టింది. ఓ బస్సును ఓవర్ టేక్ చేసే ప్రయత్నంలో ఈ ఘటన జరిగినట్లు తెలుస్తోంది. సేఫ్టీ వాల్, రెయిలింగ్ లేకపోవడంతో టెంపో నేరుగా కొండను తాకినట్లు స్థానికులు చెప్తున్నారు. అయితే ప్రమాద సమయంలో టెంపోలో డ్రైవర్ తప్ప ఎవరూ లేకపోవడంతో ప్రాణ నష్టం తప్పిందంటున్నారు. ఈ ప్రమాదంలో టెంపో ముందుభాగం ధ్వంసమైంది.