మహిళల టీ20 వరల్డ్ కప్: భారత్‌కు తొలి ఓటమి.. సౌతాఫ్రికా ఘన విజయం

దిశ, డైనమిక్ బ్యూరో: మహిళల టీ20 వరల్డ్ కప్‌లో భారత జట్టుకు తొలి ఓటమి ఎదురైంది. ఆదివారం మాంచెస్టర్‌లో జరిగిన గ్రూప్-ఏ ఉత్కంఠభరిత పోరులో సౌతాఫ్రికా మహిళల జట్టు 6 వికెట్ల తేడాతో భారత్‌పై ఘన విజయం సాధించింది. ఈ గెలుపుతో సౌతాఫ్రికా తన ప్రపంచకప్ ప్రచారంలో ఆశలు సజీవంగా ఉంచుకోగా, టోర్నీలో వరుస విజయాలతో దూసుకుపోతున్న భారత్‌కు బ్రేక్ పడింది. టాస్ గెలిచి మొదట బ్యాటింగ్ ఎంచుకున్న భారత జట్టు నిర్ణీత ఓవర్లలో 158 పరుగులు చేసింది. ఓపెనర్లు స్మృతి మంధాన (17), షెఫాలీ వర్మ ఆరంభంలో ధాటిగా ఆడినప్పటికీ.. సౌతాఫ్రికా బౌలర్లు కట్టడి చేయడంతో మిడిల్ ఓవర్లలో భారత్ వరుస వికెట్లు కోల్పోయింది. తన కెరీర్‌లో చారిత్రాత్మక 200వ టీ20 మ్యాచ్ ఆడుతున్న భారత కెప్టెన్ హర్మన్‌ప్రీత్ కౌర్ 24 పరుగులు చేయగా, దీప్తి శర్మ 29 పరుగులతో రాణించింది. సౌతాఫ్రికా బౌలర్లలో షబ్నిమ్ ఇస్మాయిల్, మారిజన్ కాప్ చెరో 2 వికెట్లు పడగొట్టారు.

అనంతరం 159 పరుగుల లక్ష్యంతో బరిలోకి దిగిన సౌతాఫ్రికాకు భారత యువ బౌలర్ శ్రీచరణి (3 వికెట్లు) ఆరంభంలోనే రెండు షాక్‌లు ఇచ్చింది. అయితే, ఆ తర్వాత సౌతాఫ్రికా స్టార్ బ్యాటర్ మారిజన్ కాప్ (45 బంతుల్లో 81 నాటౌట్) విధ్వంసకర బ్యాటింగ్‌తో చెలరేగింది. ఆమెకు తోడుగా తజ్మిన్ బ్రిట్స్ (40) రాణించడంతో మూడో వికెట్‌కు 97 పరుగుల కీలక భాగస్వామ్యం నమోదైంది. చివరికి క్లో ట్రయాన్ బౌండరీతో సౌతాఫ్రికా విజయాన్ని ఖరారు చేసింది. ఆల్‌రౌండ్ ప్రదర్శనతో అదరగొట్టిన మారిజన్ కాప్ సౌతాఫ్రికా విజయంలో కీలక పాత్ర పోషించింది.