తెలంగాణ అభివృద్ధిపై సీఎం కేసీఆర్ ఏమన్నారంటే..?
దిశ, తెలంగాణ బ్యూరో : గోల్కొండ కోటలో పతాకావిష్కరణ తర్వాత రాష్ట్ర ప్రజలను ఉద్దేశించి సీఎం కేసీఆర్ ప్రసంగించారు. రాష్ట్రంలో పరిపాలనా సౌలభ్యం కోసం పునర్వ్యవస్థీకరించామని సీఎం కేసీఆర్ ఉద్ఘాటించారు. పరిపాలన ప్రజలకు చేరువైందన్నారు. దీంతో ప్రజలకు ఇబ్బందులు రావడం లేదని, కొత్త జిల్లాలు, రెవెన్యూ మండలాలు, మండలాలు, గ్రామ పంచాయతీల ఏర్పాటు చేశామన్నారు. దీనికి అనుగుణంగా సమీకృత కలెక్టరేట్లు ఏర్పాటు చేసినట్లు సీఎం కేసీఆర్ వెల్లడించారు.
పల్లె, పట్టణ ప్రగతితో అద్భుత ప్రగతి సాధిస్తున్నామన్న కేసీఆర్ పట్టణాలు, పల్లెల్లో పరిశుభ్రత కొలువైందని, పరిశుభ్రతతోనే పరమాత్ముడు కొలువై ఉంటాడని భావించిన ప్రభుత్వం ఈ నిర్ణయం తీసుకుందన్నారు. మరణించిన వారికి సగౌరవంగా అంత్యక్రియలు నిర్వహించేందుకు వైకుంఠధామాలు ఏర్పాటు చేశామని, పచ్చదనం కోసం హరితహారం కింద ప్రకృతి వనాలు ఏర్పాటు చేశామన్నారు. ప్రతి గ్రామ పంచాయతీ ట్రాక్టర్, నీటి ట్యాంకులు కలిగి ఉంది మన రాష్ట్రంలోనేనన్నారు. రాష్ట్రం పచ్చని చెట్లు, పరిశుభ్రతతో ఆహ్లాదంగా రూపుదిద్దుకుంటున్నట్లు సీఎం కేసీఆర్ వెల్లడించారు.
