V.V. Vinayak: కొడాలి నాని లేకుంటే 'ఆది' వచ్చేదే కాదు.. ఆరోజు జరిగింది అదే

దిశ, సినిమా: టాలీవుడ్‌లో మాస్ దర్శకుడిగా మంచి గుర్తింపును సంపాదించుకున్న వారిలో వి.వి. వినాయక్ ఒకరు. ‘దిల్’ సినిమాతో దర్శకుడిగా కెరీర్ ప్రారంభించిన ఆయన, మొదటి చిత్రంతోనే మంచి విజయాన్ని అందుకుని ఇండస్ట్రీలో ప్రత్యేక గుర్తింపును సంపాదించుకున్నారు. అనంతరం జూనియర్ ఎన్టీఆర్‌తో తెరకెక్కించిన ‘ఆది’ సినిమాతో మాస్ దర్శకుడిగా తన స్థాయిని మరింత పెంచుకున్నారు. కొంతకాలం క్రితం ఓ ఇంటర్వ్యూలో పాల్గొన్న వినాయక్, ‘ఆది’ సినిమా ఎలా ప్రారంభమైందనే విషయంపై ఆసక్తికర విషయాలను వెల్లడించారు.

వినాయక్ మాట్లాడుతూ… ‘దిల్’ సినిమా పూర్తయిన తర్వాత జూనియర్ ఎన్టీఆర్‌తో సినిమా చేయాలని అనుకున్నాను. అప్పటివరకు తారక్ ఎక్కువగా క్లాస్ సినిమాల్లోనే నటించాడు, భారీ మాస్ యాక్షన్ చిత్రాలు చేయలేదు. అందుకే మొదట ఆయన కోసం ఒక క్యూట్ లవ్ స్టోరీ తయారుచేశాను అని తెలిపారు. అయితే ఒకరోజు తారక్‌ను కలిసి కథ చెబుతున్న సమయంలో కొడాలి నాని అక్కడికి వచ్చారని వినాయక్ తెలిపారు. ఆ సమయంలో కొడాలి నాని మాట్లాడుతూ… “మా హీరోతో లవ్ స్టోరీ వద్దు, మంచి మాస్ కమర్షియల్ ఎంటర్టైనర్ తీసండి” అని సూచించారని చెప్పారు. ఆ మాటతో ఆలోచనలో పడిన వినాయక్, వెంటనే కొత్త కథపై పని ప్రారంభించి చాలా వేగంగా ‘ఆది’ కథను సిద్ధం చేసి తారక్‌కు వినిపించారట.

ఆ కథ ఆయనకు బాగా నచ్చడంతో వెంటనే సినిమా షూటింగ్ ప్రారంభమైందని తెలిపారు. సినిమా విడుదలైన తర్వాత ‘ఆది’ భారీ విజయాన్ని సాధించిందని, ఆ సినిమా తనకూ, జూనియర్ ఎన్టీఆర్‌కూ గొప్ప గుర్తింపును తీసుకువచ్చిందని వినాయక్ గుర్తు చేసుకున్నారు. ఆ రోజు కొడాలి నాని వచ్చి అలా చెప్పకపోయి ఉంటే, తారక్‌తో ఒక రొమాంటిక్ లవ్ ఎంటర్టైనర్ తీసేవాడినని వినాయక్ పేర్కొన్నారు. టాలీవుడ్‌లో స్టార్ దర్శకుడిగా ఎన్నో విజయాలు సాధించిన వినాయక్ ప్రస్తుతం సినిమాలకు దూరంగా ఉన్నారు. ఆఖరుగా ఆయన హిందీలో ‘ఛత్రపతి’ సినిమాను తెరకెక్కించగా, ఆ చిత్రం ప్రేక్షకులను ఆశించిన స్థాయిలో ఆకట్టుకోలేకపోయింది.