వెంకటేష్-కళ్యాణ్ రామ్: క్రేజీ ప్రాజెక్ట్.. షూటింగ్ స్టార్ట్ అయ్యేది అప్పుడే?

దిశ, వెబ్ డెస్క్: వెంకటేష్, కళ్యాణ్ రామ్ హీరోలుగా, అనిల్ రావిపూడి దర్శకత్వంలో ఓ భారీ మల్టీస్టారర్ సినిమా మరికొన్ని రోజుల్లో ప్రారంభం కాబోతున్న విషయం తెలిసిందే. ఇప్పటికే ఈ ప్రాజెక్ట్‌కు సంబంధించిన అధికారిక ప్రకటన కూడా వెలువడింది. ఈ చిత్రాన్ని ప్రముఖ నిర్మాణ సంస్థలు సైన్ స్క్రీన్స్, సురేష్ ప్రొడక్షన్స్ బ్యానర్లపై సంయుక్తంగా నిర్మించబోతున్నారు. ప్రస్తుతం అందుతున్న సమాచారం ప్రకారం, ఈ చిత్రానికి సంబంధించిన రెగ్యులర్ షూటింగ్‌ను జూన్ చివరలో లేదా జూలై నెలలో ప్రారంభించేలా ప్లాన్ చేస్తున్నట్లు తెలుస్తోంది. అందుకు అనుగుణంగా ప్రీ-ప్రొడక్షన్ పనులు వేగంగా జరుగుతున్నాయని సమాచారం.

ఈ సినిమాను వచ్చే సంవత్సరం సంక్రాంతి కానుకగా ప్రేక్షకుల ముందుకు తీసుకురావాలని మేకర్స్ లక్ష్యంగా పెట్టుకున్నట్లు తెలుస్తోంది. అనిల్ రావిపూడి దర్శకుడిగా ప్రస్థానాన్ని కళ్యాణ్ రామ్ హీరోగా తెరకెక్కిన పటాస్ సినిమాతో ప్రారంభించాడు. అలాగే వెంకటేష్‌తో కలిసి ఎఫ్2, ఎఫ్3, సంక్రాంతికి వస్తున్నాం వంటి విజయవంతమైన చిత్రాలను రూపొందించాడు. ఇటీవల ఆయన దర్శకత్వంలో రూపొందిన మన శంకర వరప్రసాద్ గారు చిత్రంలో కూడా వెంకటేష్ భాగమయ్యారు. వెంకటేష్–కళ్యాణ్ రామ్ కలిసి నటిస్తున్న చిత్రం కావడం, దానికి అనిల్ రావిపూడి దర్శకత్వం వహించనుండడంతో ఈ క్రేజీ ప్రాజెక్టుపై ప్రేక్షకుల్లో ఇప్పటికే మంచి అంచనాలు నెలకొన్నాయి.