సెకండ్ ఇన్నింగ్స్‌లో అదరగొట్టిన ఉదయ్ భాస్కర్

దిశ, సినిమా : పదహారు ఏళ్ల నటనా అనుభవంతో మరోసారి ప్రభావం చూపించేందుకు సిద్ధమయ్యాడు నటుడు ఉదయ్ భాస్కర్. ‘2nd Innings’ మూవీతో కొత్త దశలోకి అడుగుపెట్టబోతున్నాడు. ప్రస్తుతం ఈ మూవీ పోస్ట్ ప్రొడక్షన్ దశలో ఉండగా.. చిత్రబృందం ఆయనపై ప్రశంసల వర్షం కురిపించింది. భావోద్వేగాలకు ప్రధాన ప్రాధాన్యం ఉన్న ఈ సినిమాలో.. ఆయన నటనే ప్రధాన బలంగా నిలుస్తుందని యూనిట్ సభ్యులు చెబుతున్నారు. ఉదయ్ భాస్కర్ కెరీర్‌లో ఇది ఒక కీలక మైలురాయిగా నిలవవచ్చని అంచనాలు వినిపిస్తున్నాయి. సహ నటి నక్షత్రతో ఆయన నటించిన సన్నివేశాలు సహజంగా, నిజాయితీగా వచ్చాయని.. ఇద్దరి మధ్య కనిపించే భావోద్వేగ అనుసంధానం ప్రేక్షకులను ఆకట్టుకుంటుందని చిత్ర బృందం పేర్కొంది. నటీనటుల మధ్య కెమిస్ట్రీ, మౌనాల ద్వారా చెప్పిన భావాలు ఈ చిత్రానికి ప్రత్యేక ఆకర్షణగా నిలుస్తాయని తెలుస్తోంది. ఎడిటింగ్, బ్యాక్‌గ్రౌండ్ స్కోర్, సౌండ్ డిజైన్ వంటి సాంకేతిక అంశాలపై ప్రత్యేక శ్రద్ధ పెట్టి.. ఉదయ్ భాస్కర్ నటనను మరింత ప్రభావవంతంగా ప్రేక్షకుల ముందుకు తీసుకువచ్చే ప్రయత్నం జరుగుతోందని వెల్లడించింది. ‘2nd Innings’తో మరోసారి తన నటనా స్థాయిని నిరూపించబోతున్నారని.. ఆయన ప్రదర్శన పరిశ్రమలో కొత్త చర్చలకు దారి తీసే అవకాశముందని అంచనాలు వ్యక్తమవుతున్నాయి. కాగా ఈ చిత్రం విడుదల తేదీని త్వరలో ప్రకటించనున్నట్లు చిత్ర బృందం తెలిపింది.