ఏవీఎం లేనిదే తమిళ సినీ చరిత్ర లేదు: ముఖ్యమంత్రి ఎం.కె. స్టాలిన్

దిశ, వెబ్ డెస్క్: తమిళ సినీ రంగ పితామహుడు, ఏవీఎం స్టూడియోస్ వ్యవస్థాపకుడు ఏవీఎం మెయ్యప్పన్ చెట్టియార్ (అప్పాచి) , తన కుటుంబానికి మధ్య ఉన్న దశాబ్దాల నాటి అనుబంధాన్ని ముఖ్యమంత్రి ఎం.కె. స్టాలిన్ గుర్తు చేసుకున్నారు. తమిళ చిత్ర పరిశ్రమ చరిత్ర గురించి మాట్లాడాల్సి వస్తే ఏవీఎం సంస్థ ప్రస్తావన లేకుండా అది సంపూర్ణం కాదని ఆయన కొనియాడారు. మెయ్యప్పన్ చెట్టియార్‌ను అందరూ ఎంతో గౌరవంగా 'అప్పాచి' అని పిలుచుకునేవారని, ఆయన క్రమశిక్షణ, పని పట్ల ఉన్న నిబద్ధత అందరికీ ఆదర్శమని స్టాలిన్ పేర్కొన్నారు.

తన తండ్రి, మాజీ ముఖ్యమంత్రి కరుణానిధితో ఏవీఎం సంస్థకు ఉన్న ప్రత్యేక సంబంధాన్ని స్టాలిన్ ఈ సందర్భంగా వివరించారు. ఏవీఎం స్వర్ణోత్సవ వేడుకల సమయంలో కరుణానిధి స్వయంగా పాల్గొని, సుమారు 190 జ్ఞాపికలను అందజేయడానికి చాలా సమయం వేచి ఉన్నారని గుర్తుచేశారు. అలాగే, మెయ్యప్పన్ చెట్టియార్ శతజయంతి ఉత్సవాల సందర్భంగా ఫిల్మ్ చాంబర్‌లో ఆయన విగ్రహాన్ని కరుణానిధి ఆవిష్కరించడం ద్వారా వారి మధ్య ఉన్న పరస్పర గౌరవాన్ని చాటుకున్నారని తెలిపారు.

తాను చెన్నై మేయర్‌గా ఉన్న రోజుల్లో మెరీనా బీచ్‌లో మార్నింగ్ వాక్ చేస్తున్నప్పుడు మెయ్యప్పన్ చెట్టియార్ తనను కలిసి నగర అభివృద్ధికి సంబంధించిన సలహాలు ఇచ్చేవారని స్టాలిన్ నెమరువేసుకున్నారు. ఆయన ఎప్పుడూ ఎదుటి వారిపై ఉన్న అపారమైన ప్రేమతో వినయంగా ఉండేవారని, అది భయం వల్ల కాకుండా వారిని ఒక ఆత్మీయ బంధంతో కలిపి ఉంచే గొప్ప లక్షణమని కొనియాడారు. ఏవీఎం వంటి సంస్థలు మరియు మెయ్యప్పన్ చెట్టియార్ వంటి వ్యక్తుల కీర్తి తమిళ సినీ చరిత్రలో చిరస్థాయిగా నిలిచిపోతుందని ఆయన ఆకాంక్షించారు.