Saravanthi Ravi Kishore: 100వ రోజు కూడా ఆ సినిమాకు జనాలను కంట్రోల్ చేయలేకపోయాం

దిశ, వెబ్ డెస్క్: తెలుగు సినిమా పరిశ్రమలో మంచి గుర్తింపు కలిగిన నిర్మాతలలో స్రవంతి రవి కిషోర్ ఒకరు. ఈయన ఇప్పటివరకు ఎన్నో చిత్రాలను నిర్మించారు. ఆయన కెరీర్‌ మలుపు తిప్పిన చిత్రాలలో నువ్వే కావాలి ఒకటి. తాజాగా ఈ నిర్మాత ఓ ఇంటర్వ్యూలో పాల్గొన్నారు. అందులో నువ్వే కావాలి చిత్రానికి సంబంధించిన అనేక ఆసక్తికరమైన విషయాలను వెల్లడించారు. స్రవంతి రవి కిషోర్ మాట్లాడుతూ… తాను లేడీస్ టైలర్ చిత్రంతో కెరీర్‌ను ప్రారంభించానని, ఆ తర్వాత కొన్ని పరిస్థితుల కారణంగా కష్టాల్లోకి వెళ్లిపోయానని చెప్పారు. అలాంటి సమయంలో అనుకోని సందర్భంలో ఒకసారి నువ్వే కావాలి చిత్రం ఒరిజినల్ వెర్షన్‌ను చూశానని, దానిని తెలుగులో రీమేక్ చేయాలని నిర్ణయించుకున్నానని తెలిపారు.

ఆ తర్వాత ఈ చిత్రానికి విజయ్ భాస్కర్‌ను దర్శకుడిగా ఎంపిక చేశామని చెప్పారు. ఆయనపై తాను పెట్టుకున్న నమ్మకాన్ని విజయ్ భాస్కర్ ఎంతో బాగా నిలబెట్టుకున్నారని పేర్కొన్నారు. అలాగే ఈ సినిమాలో త్రివిక్రమ్ శ్రీనివాస్ భాగం కావడం కూడా మరో మంచి విషయమని తెలిపారు. ఈ సినిమా కోసం తామందరం ఎంతో కసితో కష్టపడి పని చేశామని చెప్పారు. ఆ తర్వాత ఈ చిత్రానికి సంబంధించి రామోజీ రావు గారిని కలిసామని, ఆయన కూడా తమకు ఎంతో సపోర్ట్ ఇచ్చారని వెల్లడించారు. ఈ సినిమా 2000 అక్టోబర్ 13న విడుదలైందని, విడుదలైన మొదటి రోజున పెద్దగా పాజిటివ్ టాక్ రాలేదని, అలాగే హైదరాబాద్ వంటి పెద్ద నగరాల్లో కూడా పెద్దగా థియేటర్లు దొరకలేదని గుర్తుచేశారు.

కానీ సినిమా విడుదలైన నాలుగో రోజు నుంచి మంచి పికప్ రావడం ప్రారంభమైందని, ఆ తర్వాత భారీ కలెక్షన్లు సాధించి అద్భుత విజయాన్ని సొంతం చేసుకుందని తెలిపారు. ఇక సినిమా విడుదలైన 100వ రోజు, హైదరాబాద్ క్రాస్ రోడ్స్‌లోని ఓడియన్, ఓడియన్ డీలక్స్, ఓడియన్ మినీ థియేటర్లలో ఈ సినిమాను ప్రదర్శించగా, ప్రేక్షకులు భారీ ఎత్తున థియేటర్లకు తరలివచ్చారని, జనాలను నియంత్రించడం కూడా కష్టంగా మారిందని, ఆ సమయంలో థియేటర్ అద్దాలు కూడా బద్దలయ్యాయని తెలిపారు. అంతటి స్థాయిలో నువ్వే కావాలి చిత్రం ఆ కాలంలో గొప్ప ఇంపాక్ట్ చూపిందని స్రవంతి రవి కిషోర్ తాజాగా చెప్పుకొచ్చారు. ఇకపోతే తరుణ్ హీరోగా నటించిన ఈ సినిమాలో రీచా హీరోయిన్గా నటించింది. కోటి సంగీతం అందించారు.