Ravibabu: ఆ విషయంలో బాలయ్య నన్ను చాలా సార్లు తిట్టారు
రవిబాబు మాట్లాడుతూ... బాలకృష్ణ గారు తనతో సినిమా చేయమని చాలా సార్లు అడిగారని, ఒకటి, రెండు సార్లు “నేను అడిగినా ఎందుకు సినిమా చేయట్లేదని తనను తిట్టిన సందర్భాలు కూడా ఉన్నాయని చెప్పారు.
దిశ, వెబ్ డెస్క్: నటుడిగా, దర్శకుడిగా మంచి గుర్తింపును సంపాదించుకున్న వారిలో రవిబాబు ఒకరు. ఈయన ఇప్పటివరకు అనేక సినిమాలకు దర్శకత్వం వహించడంతో పాటు, ఎన్నో చిత్రాల్లో నటించి ప్రేక్షకులను అలరించారు. తాజాగా ఈయన “రేజర్” అనే సినిమాలో ప్రధాన పాత్రలో నటించారు. ఈ సినిమాను మే 8వ తేదీన విడుదల చేయనున్నారు. సినిమా విడుదల తేదీ దగ్గరపడుతున్న నేపథ్యంలో, రవిబాబు వరుస ఇంటర్వ్యూలలో పాల్గొంటూ ఈ సినిమా గురించి మాత్రమే కాకుండా తన వ్యక్తిగత విషయాల గురించి కూడా పలు ఆసక్తికర విషయాలను వెల్లడిస్తున్నారు.
అందులో భాగంగా తాజాగా ఇచ్చిన ఒక ఇంటర్వ్యూలో బాలకృష్ణ గురించి కొన్ని ఆసక్తికర వ్యాఖ్యలు చేశారు. ఆ ఇంటర్వ్యూలో భాగంగా, “మీరు ఇప్పటివరకు ఎన్నో సినిమాలకు దర్శకత్వం వహించి విజయాలు అందుకున్నారు. మరి మీకు ఏదైనా స్టార్ హీరో దగ్గర నుండి ఆఫర్ వచ్చిందా?” అనే ప్రశ్న రవిబాబుకు ఎదురైంది. దానికి ఆయన సమాధానంగా—బాలకృష్ణ గారు తనతో సినిమా చేయమని చాలా సార్లు అడిగారని, అంతేకాకుండా ఒకటి, రెండు సార్లు “నేను అడిగినా ఎందుకు సినిమా చేయట్లేదు?” అని తనను తిట్టిన సందర్భాలు కూడా ఉన్నాయని చెప్పారు.
దాంతో “అయితే బాలకృష్ణ గారు అడిగినా మీరు ఎందుకు సినిమా చేయలేదు?” అనే ప్రశ్న ఆయనకు ఎదురైంది. దీనికి స్పందించిన రవిబాబు... తనకు సినిమా చేయకూడదనే ఉద్దేశం ఎప్పుడూ లేదని స్పష్టం చేశారు. అయితే ఆయన అడిగిన సమయంలో తాను ఇతర సినిమాలతో బిజీగా ఉండడం, తర్వాత ఆ విషయం మర్చిపోవడం, మళ్లీ గుర్తొచ్చే సమయానికి బాలకృష్ణ గారు బిజీగా ఉండడం వంటి కారణాల వల్ల ఈ కాంబినేషన్ సెట్ కాలేదని వివరించారు. “మా ఇద్దరి మధ్య సినిమా కుదరకపోవడానికి ఇతర కారణాలు లేవు, కేవలం టైమింగ్ సమస్యలే కారణం” అని రవిబాబు క్లారిటీ ఇచ్చారు. ప్రస్తుతం బాలకృష్ణ గురించి రవిబాబు చేసిన ఈ వ్యాఖ్యలు సోషల్ మీడియాలో పెద్ద ఎత్తున వైరల్ అవుతున్నాయి.
