విజయ్ దేవరకొండ ‘కింగ్‌డమ్’ సీక్వెల్‌పై క్లారిటీ ఇచ్చిన నాగవంశీ..

దిశ, సినిమా: విజయ్ దేవరకొండ (Vijay Deverakonda)ఇటీవల ‘కింగ్‌డమ్’(Kingdom) సినిమాతో ప్రేక్షకుల ముందుకు వచ్చిన విషయం తెలిసిందే. ‘జెర్సీ’ లాంటి సూపర్ హిట్‌ను తెరకెక్కించిన గౌతమ్ తిన్ననూరి (Gowtham Tinnanuri)దర్శకత్వంలో ఈ చిత్రం రూపొందడం వల్ల రిలీజ్‌కు ముందే సినిమాపై భారీ అంచనాలు నెలకొన్నాయి. ఇందులో సత్యదేవ్ కీలక పాత్రలో కనిపించగా, భారీ యాక్షన్ డ్రామాగా రూపొందింది. కానీ భారీ అంచనాల మధ్య థియేటర్స్‌లోకి వచ్చి..బాక్సాఫీసు వద్ద డిజాస్టర్‌గా నిలిచింది. అంతేకాకుండా విమర్శలు పొందింది. మాస్ ఎలిమెంట్స్, యాక్షన్ సీక్వెన్సులు, విజువల్స్, టెక్నికల్ వాల్యూస్ పరంగా సినిమా బలంగా ఉన్నా ఆశించినంతగా హిట్ అందుకోలేక బాక్సాఫీసు వద్ద బోల్తా పడింది. ఈ సినిమాకు సంబంధించి అప్పట్లో సీక్వెల్ గురించి చర్చ కూడా జరిగింది.

ఇందులో శ్రీలంకలో ఒక జాతికి నాయకుడిగా ఆయన ఎదిగిన తర్వాత కథ కొనసాగుతుందని ప్రచారం జరిగింది. తాజాగా ఓ ఇంటర్వ్యూలో, పాల్గొన్న నిర్మాత నాగవంశీ ఈ అంశంపై క్లారిటీ ఇచ్చారు. ‘‘కింగ్‌డమ్-2 సినిమా ఉండదు. ఇప్పుడప్పుడే అలాంటి ఆలోచన లేదు. జరిగిపోయిన విషయాన్ని తవ్వి గౌతమ్‌ను ఇబ్బంది పెట్టడం తప్ప దానివల్ల ఉపయోగం ఏమీ ఉండదు. కానీ గౌతమ్ తిన్ననూరితో మా బ్యానర్‌లోనే మరో సినిమా ఉంటుంది. ప్రస్తుతం ఆయన చాలా బిజీగా ఉన్నారు. అవన్నీ షూటింగ్స్ కంప్లీట్ అయ్యాక మా ప్రాజెక్ట్ ప్రారంభం కానుంది. కానీ ‘కింగ్‌డమ్’కు సీక్వెల్‌ తీసే ఆలోచన మాత్రం లేదు’’ అని అన్నారు. దీంతో ఈ విషయం తెలుసుకున్న విజయ్ ఫ్యాన్స్ కాస్త నిరాశ చెందుతుండగా.. నెటిజన్లు మాత్రం నాగవంశీ మంచి నిర్ణయం తీసుకున్నారని అంటున్నారు.