ఆ కారణంతో డిలే అవుతున్న ఎల్లమ్మ

దిశ, వెబ్ డెస్క్: బలగం లాంటి బ్లాక్ బాస్టర్ తర్వాత తదుపరి సినిమా విషయంలో దర్శకుడు వేణు అనేక ఇబ్బందులను ఎదుర్కొంటున్నాడు. మొదట ఎల్లమ్మ అనే టైటిల్‌తో నాని హీరోగా ఓ సినిమా తెరకెక్కబోతుందని ప్రచారం జరిగింది. దాదాపు ఈ ప్రాజెక్ట్ ఫైనల్ అయి షూటింగ్ కూడా ప్రారంభం కానుందనే స్థాయిలో వార్తలు వచ్చిన తర్వాత నాని ఈ మూవీ నుంచి తప్పుకున్నాడు. ఆ తర్వాత ఈ కథలో నితిన్ హీరోగా నటించనున్నట్లు టాక్ వినిపించింది. దీనికి తగ్గట్టుగానే నిర్మాత దిల్ రాజు కూడా ఈ ప్రాజెక్ట్‌పై క్లారిటీ ఇచ్చాడు. కానీ కొన్ని కారణాల వల్ల నితిన్ కూడా ఈ సినిమా నుంచి బయటకు వచ్చాడు.

దీంతో బలగం వంటి భారీ విజయానంతరం కూడా వేణు తన తదుపరి ప్రాజెక్ట్‌ను సెట్స్‌పైకి తీసుకెళ్లడంలో ఇబ్బందులు పడుతున్నాడనే అభిప్రాయాలు వ్యక్తమయ్యాయి. ఇలాంటి సమయంలోనే సంగీత దర్శకుడు దేవిశ్రీప్రసాద్ హీరోగా ఎల్లమ్మ సినిమా ఫిక్స్ అయినట్లు అధికారిక ప్రకటన వెలువడింది. దీంతో ఈ ప్రాజెక్ట్ ట్రాక్‌లోకి వచ్చింది. అయితే ఇప్పుడు మరో సమస్య ఈ మూవీని ఆలస్యం చేస్తోందనే వార్తలు వినిపిస్తున్నాయి. ఈ సినిమాలో హీరోయిన్‌గా మంచి క్రేజ్ ఉన్న స్టార్ బ్యూటీని తీసుకోవాలని మేకర్స్ భావిస్తున్నారట.

కానీ టాప్ హీరోయిన్లు మాత్రం ఈ ప్రాజెక్ట్‌పై పెద్దగా ఆసక్తి చూపడం లేదని టాలీవుడ్ వర్గాల్లో టాక్ నడుస్తోంది. హీరోయిన్ ఎంపిక ఇంకా ఫైనల్ కాకపోవడంతో సినిమా ముందుకు వెళ్లడం ఆలస్యం అవుతోందని సమాచారం. ఇప్పటికే ఈ సినిమాలో హీరోయిన్‌గా పలువురు నటీమణుల పేర్లు సోషల్ మీడియాలో వైరల్ అయ్యాయి. కానీ మూవీ టీమ్ మాత్రం ఇప్పటివరకు ఎలాంటి అధికారిక ప్రకటన విడుదల చేయలేదు. మరి చివరికి ఎల్లమ్మలో హీరోయిన్‌గా ఎవరు ఫైనల్ అవుతారు అనేది ఇప్పుడు ఆసక్తికరంగా మారింది.