ఈ సారి సరికొత్త మమితను చూస్తారు.. దర్శకుడు విఘ్నేష్ రాజా వైరల్ కామెంట్స్

దిశ, సినిమా: బ్యాక్ టు బ్యాక్ చిత్రాలతో అలరిస్తున్న కోలీవుడ్ స్టార్ ధనుష్.. ప్రస్తుతం ‘కారా’ సినిమాతో బిజీగా ఉన్నాడు. విఘ్నేష్ రాజా దర్శకత్వంలో తెరకెక్కుతున్న ఈ చిత్రాన్ని వెల్స్ ఫిల్మ్ ఇంటర్నేషనల్ అధినేత కె. గణేష్ అత్యంత ప్రతిష్టాత్మకంగా నిర్మిస్తున్నారు. ఇప్పటికే ఈ చిత్రం నుంచి వచ్చిన ప్రతి అప్డేట్ ఎంతో ఆకట్టుకోగా.. తాజగా ఇందులో ధనుష్ సరసన మలయాళ బ్యూటీ మమిత బైజు హీరోయిన్‌గా నటిస్తున్నట్లు అఫీషియల్ అనౌన్స్‌మెంట్ ఇచ్చిన విషయం తెలిసిందే. ఇక రిలీజ్ చేసిన పోస్టర్‌లో మమిత డీ-గ్లామరస్‌గా కనిపించి అందరిని షాక్‌కు గురిచేసింది. ఈ క్రమంలోనే తాజాగా ఓ ఇంటర్వ్యూలో పాల్గొన్న డైరెక్టర్ విఘ్నేష్ మమిత పాత్రపై ఇంట్రెస్టింగ్ కామెంట్స్ చేశాడు.

‘మమిత ఇంతకుముందు డ్యూడ్, ఫీల్-గుడ్ తరహా సినిమాల్లో నటించి, తనకంటూ ఒక ప్రత్యేక అభిమాన గనాన్ని సంపాదించుకుంది. అయితే ఈ సినిమా విషయానికొస్తే.. ఇందులో గ్లామర్ అంశాలు ఏమాత్రం ఉండవని నేను ఆమెకు స్పష్టంగా చెప్పాను. ఆమె తనను తాను పూర్తిగా ఒక రామనాథపురం పల్లెటూరి అమ్మాయిగా మార్చుకుంది. మేకప్ నుండి దుస్తుల వరకు, ఒక నిజమైన పల్లె మహిళలా కనిపించడానికి, ఆ భావనను సొంతం చేసుకోవడానికి మమిత ఎంతో కృషి చేసింది. కేవలం నటనలో మాత్రమే కాదు, ఆ పాత్రలోని భావోద్వేగ గాఢతను, ఆమె పడే కష్టాలను తెరపై ఆవిష్కరించడంలోనూ తను అద్భుతంగా రాణించింది. మమిత తన నటనతో మీ మనసులను నిజంగా కదిలిస్తుంది. కారా సినిమాతో ప్రేక్షకులు ఇంతకుముందు ఎప్పుడూ చూడని మమిత యొక్కసరికొత్త రూపం చూడబోతున్నా’ అని తెలిపాడు.