బార్డర్‌ 2లో దిల్జిత్‌ దొసాంజే ఎంపిక.. ఎఫ్‌డబ్ల్యూఐసీఈ ఆగ్రహం

దిశ, వెబ్ డెస్క్: సర్దార్‌జీ 3 సినిమాలో (Sardaar Ji 3) పాక్‌ నటి హనియా ఆమిర్‌తో (Pakistani actress Hania Aamir) కలిసి నటించినందుకు నటుడు, సింగర్ దిల్జిత్‌ దొసాంజేపై(Diljit Dosanjh) గత కొన్ని రోజులుగా తీవ్ర విమర్శలు వస్తోన్న సంగతి తెలిసిందే. ఈ క్రమంలో సైనికుల త్యాగాల కథాంశంతో తెరకెక్కనున్న 'బార్డర్‌ 2' సినిమాకు దిల్జిత్‌ను ఎంపిక చేయటంపై ఫెడరేషన్‌ ఆఫ్‌ వెస్ట్రన్‌ ఇండియా సినీ ఎంప్లాయిస్‌ (FWICE) ఆగ్రహం వ్యక్తంచేసింది. ఈ ఎంపికను పున:పరిశీలించుకోవాలంటూ నిర్మాతలకు లేఖ రాసింది. ఇది జాతీయ భావాలను స్పష్టంగా ఉల్లంఘించడంగా లేఖలో అభివర్ణించింది. ప్రస్తుత పరిస్థితుల్లో ఇలాంటి సినిమాలో దిల్జిత్‌ దొసాంజేను ఎంపిక చేయడం సరైన నిర్ణయం కాదంటూ అసహనం వ్యక్తంచేసింది.

కాగా, భారత్‌-పాకిస్థాన్‌ 1971 యుద్ధం నేపథ్యంలో సన్నీ దేవోల్‌, జాకీష్రాఫ్‌, సునీల్‌ శెట్టి, అక్షయ్‌ ఖన్నా ప్రధాన పాత్రధారులుగా 1997లో వచ్చిన 'బార్డర్‌' చిత్రం ఘన విజయం సాధించిన సంగతి తెలిసిందే. దీనికి జేపీ దత్తా దర్శకత్వం వహించారు. దీనికి సీక్వెల్‌గా 'బార్డర్‌ 2' చిత్రాన్ని రూపొందిస్తున్నారు.