టాలీవుడ్ ఇండస్ట్రీలో తీవ్ర విషాదం... గుజ్జలపూడి హరి కన్నుమూత

దిశ, సినిమా: సినీ పరిశ్రమలో వరుస విషాదాలు చిత్ర పరిశ్రమను తీవ్ర కలవరానికి గురిచేస్తున్నాయి. ఇటీవలి కాలంలో కొందరు ప్రముఖులు అనారోగ్య కారణాలతో ప్రాణాలు కోల్పోతుంటే.. మరికొందరు మాత్రం ఊహించని విధంగా గుండెపోటుతో ప్రాణాలు కోల్పోతున్నారు. తాజాగా, టాలీవుడ్ ఇండస్ట్రీలో మరో ఘోర విషాదం చోటుచేసుకుంది. ప్రముఖ డిస్ట్రిబ్యూటర్, డబ్బింగ్ చిత్రాల నిర్మాత గుజ్జలపూడి హరి ఈరోజు ఉదయం కన్నుమూశారు నెల్లూరు జిల్లాకు చెందిన గుజ్జలపూడి హరి ఈరోజు ఉదయం ఒక్కసారిగా గుండెపోటు రావడంతో తుదిశ్వాస విడిచారు. కేవలం 47 ఏళ్ల చిన్న వయసులోనే ఆయన ఇలా ఆకస్మికంగా దూరమవ్వడం సినిమా పంపిణీ రంగాన్ని తీవ్ర దిగ్భ్రాంతికి గురిచేసింది. ఆయన మరణవార్త విన్న సినీ వర్గాలు ఒక్కసారిగా షాక్‌కు గురయ్యాయి. టాలీవుడ్‌లో గుజ్జలపూడి హరికి ఒక ప్రత్యేకమైన గుర్తింపు ఉంది.

ఆయన హరి వెంకటేశ్వర పిక్చర్స్ అనే పంపిణీ సంస్థను స్థాపించి, డిస్ట్రిబ్యూషన్ రంగంలో ఎంతో వేగంగా అగ్ర స్థానానికి ఎదిగారు. సినిమా బిజినెస్‌పై ఆయనకున్న పట్టు, అంచనాలు అద్భుతంగా ఉండేవి. ఈ నమ్మకంతోనే టాలీవుడ్‌లోని టాప్ ప్రొడక్షన్ హౌసెస్ అయిన వైజయంతీ మూవీస్, శ్రీ వెంకటేశ్వర క్రియేషన్స్, దిల్ రాజు సంస్థ, అన్నపూర్ణ స్టూడియోస్ వంటి అగ్ర నిర్మాణ సంస్థల చిత్రాలను పంపిణీ చేసి ఎన్నో ఘన విజయాలను అందుకున్నారు. హరి కేవలం ఒక డిస్ట్రిబ్యూటర్‌గానే కాకుండా ఇండస్ట్రీలోని పెద్ద పెద్ద నిర్మాతలు, స్టార్ హీరోలతో అత్యంత బలమైన వ్యక్తిగత అనుబంధాన్ని కలిగి ఉండేవారు. పంపిణీ రంగంలో రాణిస్తూనే, తమిళంలో సూపర్ హిట్ అయిన కొన్ని క్రేజీ ప్రాజెక్ట్‌లను తెలుగులోకి డబ్ చేసి నిర్మాతగా కూడా మంచి గుర్తింపు తెచ్చుకున్నారు.