శబ్దంతో ఉత్కంఠ మొదలవుతుంది.. క్రైమ్ థ్రిల్లర్ ‘బ్లైండ్‌స్పాట్’ అప్డేట్ వచ్చేస్తుందంటూ మేకర్స్ ట్వీట్

దిశ, సినిమా: టాలీవుడ్ హీరో నవీన్ చంద్ర(Naveen Chandra) అందాల రాక్షసి, త్రిపుర వంటి సినిమాలతో మంచి గుర్తింపు తెచ్చుకున్నాడు. తెలుగు, తమిళ చిత్రాల్లో నటించి ప్రేక్షకులను మెప్పించాడు. చివరగా ‘మంత్ ఆఫ్ మధు’ మూవీలో కనిపించాడు. ఆ తర్వాత ఏడాది పాటు కాస్త గ్యాప్ తీసుకున్న ఆయన వరుస సినిమాలు చేస్తూ దూసుకుపోతున్నాడు. హిట్, ఫ్లాప్‌తో సంబంధం లేకుండా బ్యాక్ టు బ్యాక్ మూవీస్ చేస్తున్నాడు. ప్రస్తుతం నవీన్ చంద్ర నటిస్తున్న లేటెస్ట్ సినిమా ‘బ్లైండ్‌స్పాట్’(Blindspot). రాకేష్ వర్మ దర్శకత్వం వహిస్తుండగా.. క్రైమ్ థ్రిల్లర్‌గా తెరకెక్కుతున్న ఈ సినిమాను రాశి సింగ్(Rashi Singh) హీరోయిన్‌గా నటిస్తోంది.

ఇందులో రవివర్మ(Ravi Varma), గాయత్రి భార్గవి, అలీ రేజా కీలక పాత్రలో కనిపించబోతున్నారు. అయితే ఈ చిత్రాన్ని మ్యాంగో మాస్ మీడియా బ్యానర్‌పై రామకృష్ణ వీరపనేని నిర్మిస్తున్నారు. షూటింగ్ జరుపుకుంటున్న ఈ సినిమా మే9న థియేటర్స్‌లోకి రాబోతుంది. దీంతో మూవీ మేకర్స్ వరుస అప్డేట్ రిలీజ్ చేస్తున్నారు. తాజాగా, చిత్రబృందం ‘బ్లైండ్‌స్పాట్’ నుంచి థీమ్ సాంగ్ రాబోతున్నట్లు ప్రకటించారు. ‘కనిపించేవన్నీ’ అని సాగే ఈ పాట మే 3న ఉదయం 11 గంటలకు రాబోతున్నట్లు తెలిపారు. అంతేకాకుండా నవీన్ చంద్ర పోస్టర్‌ను షేర్ చేశారు. ఇందులో ఆయన సిగరెట్ తాగుతూ షాకింగ్ లుక్‌లో కనిపించారు. ప్రస్తుతం ఈ పోస్టర్ ప్రేక్షకుల్లో క్యూరియాసిటీని పెంచుతోంది.