అల్లు అర్జున్–అట్లీ మూవీలో బిగ్ సర్‌ప్రైజ్.. అనుష్క శర్మ ఎంట్రీ?

దిశ, వెబ్ డెస్క్: ఐకాన్ స్టార్ అల్లు అర్జున్ – స్టార్ దర్శకుడు అట్లీ కుమార్ కాంబినేషన్‌లో ప్రస్తుతం ఓ భారీ చిత్రం తెరకెక్కుతోంది. ఈ సినిమాకు ఇంకా అధికారిక టైటిల్‌ను ఖరారు చేయలేదు. ప్రస్తుతానికి ‘AA22 X A6’ అనే వర్కింగ్ టైటిల్‌తో ఈ ప్రాజెక్ట్‌ను మేకర్స్ ప్రకటించారు. అనౌన్స్మెంట్ జరిగిన నాటి నుంచే ఈ సినిమాపై ప్రేక్షకుల్లో భారీ స్థాయిలో హైప్ నెలకొంది. ఈ ప్రాజెక్ట్‌కు మొదటి నుంచే మంచి క్రేజ్ రావడానికి ప్రధాన కారణం మేకర్స్ విడుదల చేసిన ప్రచార చిత్రాలేనని చెప్పాలి.

సినిమా అనౌన్స్మెంట్ సందర్భంగా విడుదల చేసిన వీడియో హాలీవుడ్ స్థాయిలో ఉండడంతో సినీ అభిమానుల దృష్టిని ఆకర్షించింది. ఆ తర్వాత హీరోయిన్‌గా దీపిక పదుకొనే నటించనున్నట్లు వెల్లడిస్తూ విడుదల చేసిన ప్రత్యేక వీడియో కూడా ప్రేక్షకులను విశేషంగా ఆకట్టుకుంది. ఈ మూవీతో అల్లు అర్జున్–అట్లీ హాలీవుడ్ మార్కెట్‌ను లక్ష్యంగా పెట్టుకున్నట్లు ఇండస్ట్రీ వర్గాల్లో చర్చ జరుగుతోంది. ఈ సినిమాలో రష్మిక మందన, మృనాల్ ఠాకూర్, జాన్వి కపూర్ వంటి క్రేజీ హీరోయిన్లు కీలక పాత్రల్లో కనిపించబోతున్నట్లు ఇప్పటికే వార్తలు వినిపిస్తున్నాయి.

తాజాగా ఈ జాబితాలోకి మరో స్టార్ బ్యూటీ చేరనున్నట్లు టాక్ వినిపిస్తోంది. బాలీవుడ్ స్టార్ హీరోయిన్ అనుష్క శర్మ కూడా ఈ సినిమాలో కీలకమైన పాత్రలో నటించే అవకాశాలు ఉన్నట్లు ఓ వార్త సోషల్ మీడియాలో పెద్ద ఎత్తున వైరల్ అవుతోంది. చాలా కాలంగా సినిమాలకు దూరంగా ఉన్న అనుష్క శర్మ ఈ ప్రాజెక్ట్‌తో తిరిగి కమ్‌బ్యాక్ ఇవ్వబోతున్నట్లు ప్రచారం జరుగుతోంది. ఈ చిత్రానికి సంబంధించిన టీజర్‌ను ఏప్రిల్ 8వ తేదీన అల్లు అర్జున్ పుట్టినరోజు సందర్భంగా విడుదల చేయాలని మేకర్స్ ప్లాన్ చేస్తున్నట్లు సమాచారం.