సునీత చేతుల మీదుగా బ్యాండ్ క్యాప్రిసియో చారిత్రక యూఎస్ఏ టూర్ 2026 పోస్టర్ ఆవిష్కరణ

దిశ, సినిమా : ప్రఖ్యాత ప్లేబ్యాక్ సింగర్ సునీత హైదరాబాద్‌లో జరిగిన మీడియా సమావేశంలో బ్యాండ్ క్యాప్రిసియో యూఎస్ఏ టూర్ 2026 పోస్టర్‌ను ఆవిష్కరించారు. ఇది ఏ తెలుగు బ్యాండ్ ఇప్పటివరకు చేయని విధంగా అత్యంత భారీ యూఎస్ఏ టూర్ ప్రారంభానికి నాంది పలికింది. ఈ సందర్భంగా బ్యాండ్ క్యాప్రిసియో సభ్యులు ఎక్నాథ్ కిరణ్ మరియు శ్రావణ్ మాట్లాడుతూ, తమ సంగీత ప్రయాణ ప్రారంభ దశలోనే సునీత గారు మొదటిసారిగా తమను యూఎస్ఏకు టూర్‌కు తీసుకెళ్లిన సంగీతకారిణి అని గుర్తుచేశారు. ఇప్పుడు అదే సునీత గారు తమ దాదాపు 30 నగరాల యూఎస్ఏ టూర్ పోస్టర్‌ను ఆవిష్కరించడం తమకు ఫుల్ సర్కిల్ మూమెంట్‌లా ఉండటమే కాకుండా ‘ఐసింగ్ ఆన్ ద కేక్’ లా అనిపించిందని వారు భావోద్వేగంగా తెలిపారు. యూఎస్ఏ టూర్ 2026 మొత్తం అమెరికా వ్యాప్తంగా దాదాపు 30 నగరాల్లో జరగనుండగా, ఇది ఏ తెలుగు బ్యాండ్ ఇప్పటివరకు ప్రయత్నించని స్థాయిలో జరుగుతున్న చారిత్రక టూర్‌గా నిలవనుంది. ఈ టూర్‌లో తొలి దశగా RISE టూర్ పేరుతో ఫిబ్రవరి–మార్చి 2026లో ప్రదర్శనలు జరగనున్నాయి.

ఈ సందర్భంగా సునీత మాట్లాడుతూ.. “తమ ప్రారంభ రోజుల్లో చూసిన బ్యాండ్ క్యాప్రిసియో ఈ రోజు 30 నగరాల యూఎస్ఏ టూర్‌కు సిద్ధమవడం నాకు ఎంతో గర్వంగా ఉంది. ఈ చారిత్రక ప్రయాణాన్ని ఆరంభం చేయగలగడం నాకు చాలా ఆనందంగా ఉంది. ఈ టూర్ ఘన విజయం సాధించాలని హృదయపూర్వకంగా కోరుకుంటున్నాను” అని తెలిపింది.

ఇక ఈ టూర్‌ను వెడమ్ ఆర్ట్ ప్రెజెంట్ చేస్తుండగా, ఎలెవెన్ పాయింట్ టూ కో-ప్రెజెంట్ చేస్తోంది. వెడమ్ ఆర్ట్ యూఎస్ఏ కేంద్రంగా పనిచేస్తున్న ప్రముఖ లైవ్ ఎంటర్‌టైన్‌మెంట్ సంస్థగా, ఉత్తర అమెరికా మరియు భారత్‌లో భారీ స్థాయి సంగీత కార్యక్రమాలు నిర్వహిస్తోంది. అలాగే యూఎస్ఏలో మొదటిసారిగా ఇండియన్ ఇండిపెండెంట్ మ్యూజిక్ ఫెస్టివల్ ‘గిగ్‌వెడమ్’*ను నిర్వహించిన ఘనత కూడా ఈ సంస్థకే దక్కుతుంది. తమ విస్తృతి, ఆశయం మరియు అపూర్వ స్థాయి ప్రణాళికతో, బ్యాండ్ క్యాప్రిసియో యూఎస్ఏ టూర్ 2026 ప్రపంచ వేదికపై తెలుగు లైవ్ మ్యూజిక్‌కు ఒక చారిత్రక అధ్యాయంగా నిలవనుంది.