TELUGU HEROINES: అప్పుడు రాలేదన్నారు.. ఇప్పుడు ఛాన్సుల్లేవ్ అంటున్నారు
తెలుగమ్మాయిలు కూడా ముంబాయి భామలకు సమానంగా ఎలాంటి సన్నివేశాల్లో నటించడానికి అయినా సిద్ధపడుతున్నారు. సోషల్ మీడియాలో అందాలు ఆరబోస్తున్నారు. ముంబాయి భామలకు పోటీగా నటించడమే కాకుండా ఫిట్నెస్ మెయింటైన్ చేస్తున్నారు. అయినప్పటికీ అవకాశాలు మాత్రం దక్కడంలేదు.
దిశ, వెబ్ డెస్క్: ఒకప్పుడు తెలుగు సినిమాల్లో తెలుగమ్మాయిలకు ఎందుకు అవకాశాలు ఇవ్వడంలేదని అడిగితే దర్శకనిర్మాతలు మనవాళ్లు అందాలు చూపించరనే సమాధానం చెప్పేవాళ్లు. హైదరాబాద్ లో ఆడిషన్స్ పెడితే ఎవరూ కనిపించరని అనేవాళ్లు. గతంలో డైరెక్టర్ పూరీ జగన్నాథ్ సహా చాలా మంది ఇలాంటి కామెంట్లే చేశారు. అయితే ఇప్పుడు మాత్రం పరిస్థితి మారింది. తెలుగమ్మాయిలు కూడా ముంబాయి భామలకు సమానంగా ఎలాంటి సన్నివేశాల్లో నటించడానికి అయినా సిద్ధపడుతున్నారు. సోషల్ మీడియాలో అందాలు ఆరబోస్తున్నారు. ముంబాయి భామలకు పోటీగా నటించడమే కాకుండా ఫిట్నెస్ మెయింటైన్ చేస్తున్నారు. అయినప్పటికీ అవకాశాలు మాత్రం దక్కడంలేదు.
చిన్న సినిమాల్లో నటించి హిట్లు కొట్టినా తరవాత మాత్రం కనుమరుగు అవ్వాల్సిందే. ఒకరిద్దరు కూడా చాలామంది తెలుగమ్మాయిల పరిస్థితి టాలీవుడ్ లో అలానే ఉంది. తెలుగమ్మాయి అంజలి ఇండస్ట్రీలోకి ఎంట్రీ ఇచ్చి తన నటనతో మెప్పించింది . సీతమ్మవాకిట్లో సిరిమల్లె చెట్టు సినిమాలో హీరో వెంకటేష్ కు జోడీగా నటించినా తరవాత మాత్రం చెప్పుకోదగ్గ ఛాన్సులు రాలేదు. ఈమెకు తెలుగు కంటే తమిళ్ లోనే ఒక్కువ అవకాశాలు వచ్చాయి. బలగం సినిమాతో ప్రేక్షలకు మెప్పించిన బ్యూటీ కావ్య కళ్యాణ్ రామ్. ఈ సినిమా సూపర్ హిట్ గా నిలిచింది. కానీ తరవాత కావ్యకు కూడా చెప్పుకోదగ్గ అవకాశాలు రాలేదు.
ఒకటి రెండు సినిమాలు చేసినా అవి కూడా చిన్నసినిమాలే. ఖమ్మం పిల్ల అనన్య నాగళ్లది కూడా అలాంటి పరిస్థితే. అనన్య నాగళ్ల 2019లో మల్లేశం సినిమాతో ప్రేక్షకుల ముందుకు వచ్చింది. ఈ సినిమా కూడా మంచి విజయం సాధించింది. తరవాత పవన్ వకీల్ సాబ్ సినిమాలో ఓ చిన్న రోల్ చేసింది. సోషల్ మీడియాలో అందాలు ఆరబోసినా అవకాశాలు మాత్రం రావడంలేదు. మరోవైపు టాక్సీవాలా సినిమాతో ప్రేక్షకులను ఫిదా చేసిన తెలుగందం ప్రియాంక జవాల్కర్. ప్రియాంక షార్ట్ ఫిల్మ్స్ తో ఎంట్రీ ఇచ్చి తన టాలెంట్ తో సినిమా అవకాశాలు అందుకుంది. టాక్సీవాలా తరవాత కిరణ్ అబ్బవరం నటించిన ఎస్ఆర్ కళ్యాణమండపం తప్ప మరో సినిమాలో హీరోయిన్ గా ఛాన్స్ రాలేదు. ఒకటి రెండు సినిమాల్లో గెస్ట్ రోల్స్ చేసింది. వీళ్లు మాత్రమే కాదు చాందిని చౌదరి, ఇషా రెబ్బ, బిందు మాధవి, కలర్స్ స్వాతి, వైష్ణవి చైతన్య ప్రతిఒక్కరిదీ ఇదే పరిస్థితి.
