శుక్రాచార్యగా అక్షయ్ ఖన్నా… ‘మహాకాళి’లో కీలక పాత్ర షూటింగ్ పూర్తి

దిశ, వెబ్ డెస్క్: హనుమాన్ దర్శకుడు ప్రశాంత్ వర్మ సినిమాటిక్ యూనివర్స్‌లో రూపొందుతున్న ‘మహాకాళి’ సినిమాలో ప్రముఖ నటుడు అక్షయ్ ఖన్నా కీలక పాత్రలో నటిస్తున్నారు. ఈ చిత్రంలో ఈ నటుడు ‘శుక్రాచార్య’ అనే పాత్రలో కనిపించనున్నారు. తాజాగా ఈ పాత్రకు సంబంధించిన తన షూటింగ్‌ పార్ట్ అక్షయ్ ఖన్నా విజయవంతంగా పూర్తి చేసినట్లు ఈ చిత్రబృందం ప్రకటించింది. ఇప్పటికే ఈ యూనివర్స్‌కు మంచి గుర్తింపు రావడంతో ‘మహాకాళి’ సినిమాపై ప్రేక్షకుల్లో అంచనాలు తారస్థాయిలో నెలకొన్నాయి. ముఖ్యంగా శుక్రాచార్య పాత్రలో అక్షయ్ ఖన్నా ఎలా కనిపిస్తారో అనే ఆసక్తి అభిమానుల్లో పెరుగుతోంది.

తాజాగా ఈయన ధురంధుర్ చిత్రం ద్వారా ఇండియా వ్యాప్తంగా గుర్తింపు సంపాదించుకున్నారు. దాంతో ఈయన పాత్రపై కూడా ప్రేక్షకుల్లో మంచి క్యూరియాసిటీ నెలకొంది. ఇక ఈ సినిమా చివరి షెడ్యూల్ షూటింగ్ హైదరాబాద్ నగరంలో మరికొన్ని రోజుల్లో ప్రారంభం కానుంది. సుమారు 40 రోజుల పాటు ఈ షెడ్యూల్ కొనసాగనుంది. ఈ షెడ్యూల్ పూర్తయిన అనంతరం సినిమా విడుదల తేదీని అధికారికంగా అనౌన్స్ చేయనున్నారు. ప్రశాంత్ వర్మ సినిమాటిక్ యూనివర్స్‌లో మరో భారీ చిత్రంగా ఈ సినిమా నిలవనుందని సినీ వర్గాలు భావిస్తున్నాయి.