Harley-Davidson: బైక్‌ లవర్స్‌కు గుడ్‌ న్యూస్.. హార్లే-డేవిడ్సన్ ధర తగ్గే ఛాన్స్?

దిశ, వెబ్‌డెస్క్: Harley-Davidson: లగ్జరీ బైకుల్లో హార్లీడేవిడ్సన్(Harley-Davidson) బైక్ కూడా ఒకటి. ప్రపంచవ్యాప్తంగా ఈ బ్రాండ్ కు మంచి క్రేజ్ ఉంటుంది. డిమాండ్ కూడా భారీగానే ఉంటుంది. కుర్రాళ్లు ఈ బ్రాండ్ బైక్ అంటే తెగ లైక్ చేస్తుంటారు. అయితే ఈ బ్రాండ్ బైక్ లు కాస్త ఎక్కువ ధర ఉంటాయి. అందుకే సామాన్యులు ఈ బైక్ కొనాలంటేనే జంకుతుంటారు. ఈ సమయంలో హార్లే డేవిడ్సన్(Harley-Davidson) బైక్ లవర్స్ శుభవార్త వినిపించే అవకాశం ఉంది.

అమెరికా అధ్యక్షుడు డొనాల్డ్ ట్రంప్ (Donald trump) పరస్పర సుంకాలపై పట్టుబట్టడం వల్ల అమెరికాకు చెందిన ప్రముఖ బైక్ కంపెనీ హార్లే డేవిడ్సన్(Harley-Davidson) భారతదేశంలో మరోసారి కొనుగోళ్లు ఊపందుకునే అవకాశం ఉన్నట్లు తెలుస్తోంది. ఈ నెల ప్రారంభంలో సమర్పించిన బడ్జెట్‌లో దిగుమతి చేసుకున్న ఖరీదైన బైక్‌లపై కస్టమ్స్ సుంకాన్ని ఇప్పటికే తగ్గించారు. ప్రస్తుతం భారత భాగస్వామి హీరో మోటోకార్ప్(Hero MotoCorp) సహకారంతో అభివృద్ధి చేసిన X-440 అనే ఒకే ఒక మోడల్‌ను మాత్రమే విక్రయిస్తున్న హార్లే డేవిడ్సన్(Harley-Davidson).. ఒకప్పుడు భారతదేశంలో 33 డీలర్‌షిప్‌లతో రూ. 4.69 లక్షల ప్రారంభ ధరకు 13 మోడళ్లను ప్రారంభించింది. 2020 ప్రారంభంలో, కంపెనీ తన తయారీ, అమ్మకాల కార్యకలాపాలను నిలిపివేసింది.

2025-26 కేంద్ర బడ్జెట్‌లో ఆర్థిక మంత్రి నిర్మలా సీతారామన్, 1,600 సిసి అంతకంటే ఎక్కువ ఇంజిన్ సామర్థ్యం కలిగిన మోటార్‌సైకిళ్లపై కస్టమ్స్ సుంకా(Customs duty)న్ని 50 శాతం నుండి 30 శాతానికి తగ్గించారు. అదేవిధంగా, సెమీ-బిల్ట్ యూనిట్లు (SKD)గా దిగుమతి చేసుకునే మోటార్ సైకిళ్లపై కస్టమ్స్ సుంకాన్ని 20.5 శాతం నుండి 20 శాతానికి తగ్గించారు. CKD మోటార్ సైకిళ్లపై, అంటే విదేశాల నుండి విడిభాగాలు వచ్చి పూర్తిగా భారతదేశంలో తయారు చేసిన మోటార్ సైకిళ్లపై సుంకాన్ని 15 శాతం నుండి 10 శాతానికి తగ్గించారు.

పరిశ్రమ నిపుణుల అభిప్రాయం ప్రకారం, దిగుమతి చేసుకున్న చాలా బైక్‌లపై అమెరికా సున్నా సుంకం విధిస్తుంది. అయితే, 500 సిసి నుండి 800 సిసి మధ్య ఇంజిన్ సామర్థ్యం కలిగిన ద్విచక్ర వాహనాలకు 1.2 శాతం సుంకం వసూలు చేయగా, 800 సిసి కంటే ఎక్కువ సామర్థ్యం ఉన్న వాటికి 2.4 శాతం సుంకం వసూలు చేస్తారు. ప్రధానమంత్రి నరేంద్ర మోడీ(MODI), అమెరికా అధ్యక్షుడు డొనాల్డ్ ట్రంప్(Donald trump) మధ్య అమెరికాలో జరిగిన చర్చల తర్వాత భారతదేశం-అమెరికా సంయుక్త ప్రకటన ప్రకారం, ద్వైపాక్షిక వాణిజ్య అడ్డంకులను తొలగించడానికి ఇద్దరు నేతలు నిబద్ధతను వ్యక్తం చేశారు. భారతదేశం ఇటీవల తీసుకున్న సుంకాల తగ్గింపు చర్యలను అమెరికా స్వాగతించింది. అయితే హార్లే డేవిడ్సన్(Harley-Davidson) భారతీయ భాగస్వామి హీరో మోటోకార్ప్ నుండి బ్రాండ్ సామర్థ్య విస్తరణపై ప్రశ్నలకు ప్రతిస్పందన రాలేదు.