SEBI: షేర్ బైబ్యాక్లకు మళ్లీ గ్రీన్ సిగ్నల్
ఈ కొత్త విధానం వచ్చే ఆగస్టు 1 నుంచి అమల్లోకి వస్తుందని సెబీ చీఫ్ తుహిన్ కాంత పాండే విలేకరుల సమావేశంలో స్పష్టం చేశారు.
దిశ, బిజినెస్ బ్యూరో: షేర్ మార్కెట్ నియంత్రణ సంస్థ 'సెబీ' కార్పొరేట్ కంపెనీలకు గుడ్ న్యూస్ చెప్పింది. గతంలో రద్దు చేసిన ‘ఓపెన్-మార్కెట్ బైబ్యాక్’ (స్టాక్ ఎక్స్ఛేంజీల ద్వారా నేరుగా షేర్లను తిరిగి కొనుగోలు చేసే పద్ధతి) విధానాన్ని మళ్లీ ప్రవేశపెట్టే ప్రతిపాదనకు సెబీ బోర్డు శుక్రవారం అధికారికంగా ఆమోదం తెలిపింది. ఈ కొత్త విధానం వచ్చే ఆగస్టు 1 నుంచి అమల్లోకి వస్తుందని సెబీ చీఫ్ తుహిన్ కాంత పాండే విలేకరుల సమావేశంలో స్పష్టం చేశారు. ప్రస్తుతం కంపెనీలు తమ సొంత షేర్లను తిరిగి కొనాలంటే కేవలం 'టెండర్ ఆఫర్' (వాటాదారులందరి నుంచి దామాషా ప్రకారం కొనే పద్ధతి) మాత్రమే ఉండేది. అయితే, ఈ టెండర్ పద్ధతి వల్ల ఒకేసారి ఫిక్స్డ్ రేటుకు కట్టుబడి ఉండాల్సి రావడం, మార్కెట్ పరిస్థితులకు తగ్గట్టుగా విడతల వారీగా కొనుగోలు చేసే వీలు లేకపోవడంతో కంపెనీలు ఇబ్బంది పడుతున్నాయి. ఇప్పుడు సెబీ తీసుకున్న తాజా నిర్ణయంతో కంపెనీలు నేరుగా సెకండరీ మార్కెట్ (స్టాక్ ఎక్స్ఛేంజ్) నుండే తమ వీలును బట్టి, నచ్చిన సమయంలో షేర్లను కొనుగోలు చేసే పూర్తి స్వేచ్ఛ, సౌలభ్యం లభిస్తాయి. కొత్త నిబంధనల ప్రకారం ఈ ఓపెన్ మార్కెట్ బైబ్యాక్ ప్రక్రియను గరిష్టంగా 60 రోజుల్లోపు పూర్తి చేయాల్సి ఉంటుంది.
గతంలో ఈ ఓపెన్ మార్కెట్ విధానం వల్ల కొన్ని సమస్యలు రావడం వల్లే సెబీ దీన్ని దశలవారీగా నిలిపివేసింది. పాత పద్ధతిలో కంపెనీలు తమ సొంత మార్కెట్ ధరలను కృత్రిమంగా ప్రభావితం చేసే అవకాశం ఉండటం, అలాగే చిన్న ఇన్వెస్టర్లకు సమానంగా పాల్గొనే అవకాశం లభించకపోవడంపై తీవ్ర విమర్శలు వచ్చాయి. అయినప్పటికీ, కంపెనీల వద్ద ఉన్న అదనపు నగదును ఇన్వెస్టర్లకు తిరిగి ఇవ్వడానికి, ఒక్కో షేరుపై వచ్చే ఆదాయాన్ని (ఈపీఎస్) పెంచడానికి, తమ భవిష్యత్ బిజినెస్పై మార్కెట్లో నమ్మకాన్ని పెంచేందుకు 'బైబ్యాక్' అనేది కంపెనీలకు ఒక శక్తివంతమైన ఆయుధం. బహిరంగ మార్కెట్ విధానం అందుబాటులో లేకపోవడం వల్ల కంపెనీల మూలధన కేటాయింపు అవకాశాలు పరిమితమయ్యాయని గుర్తించిన సెబీ, ఈసారి తగిన జాగ్రత్తలు, పారదర్శకతతో కూడిన కొత్త ఫ్రేమ్వర్క్ను తీసుకువస్తోంది.
