భారత్ - యూరప్ మధ్య ట్రేడ్ డీల్.. Budget - 2026పై రిటైల్ రంగం ఆశలు

దిశ, వెబ్‌డెస్క్: భారత్ - యూరోపియన్ యూనియన్ (EU) మధ్య ఇటీవల భారీ ట్రేడ్ డీల్ జరిగిన విషయం తెలిసిందే. ఈ డీల్ పై అమెరికా గుర్రుగా కూడా ఉంది. ప్రపంచ దేశాల్లో ఈ డీల్ పై తీవ్ర చర్చ జరుగుతోంది. ఇది అమల్లోకి వస్తే.. ఫ్యాషన్, లైఫ్ స్టైల్, ఆహార ఉత్పత్తుల ధరలు క్రమంగా తగ్గుముఖం పడుతాయని నిపుణులు అంచనా వేస్తున్నారు. ఫలితంగా ఇంటర్నేషనల్ బ్రాండ్లు భారత్ మార్కెట్లోకి మరింత వేగంగా ప్రవేశించే అవకాశం ఏర్పడుతుంది. అదే సమయంలో భారత ఎగుమతిదారులకు కూడా కొత్త అవకాశాలు అందుబాటులోకి వస్తాయి. అయితే ఈ ఒప్పందం దేశీయ కంపెనీలకు గట్టి పోటీని తెచ్చిపెట్టే అవకాశం ఉందని పరిశ్రమ వర్గాలు ఆందోళన వ్యక్తం చేస్తున్నాయి. ముఖ్యంగా కాస్మెటిక్స్, మద్యం, ప్రీమియం ఆహార ఉత్పత్తుల రంగాల్లో విదేశీ బ్రాండ్లతో పోటీ పెరిగే అవకాశం ఉంది.

యూరప్ తో డీల్.. స్థానిక కంపెనీలకు గట్టి పోటీ

భారత్–యూరోపియన్ యూనియన్ (EU) మధ్య ప్రతిపాదిత వాణిజ్య ఒప్పందం అమలులోకి వస్తే, ఫ్యాషన్, లైఫ్‌స్టైల్, ఆహార ఉత్పత్తుల ధరలు క్రమంగా తగ్గే అవకాశం ఉందని నిపుణులు చెబుతున్నారు. దీని వల్ల అంతర్జాతీయ బ్రాండ్లు భారత మార్కెట్‌లోకి మరింతగా ప్రవేశించే అవకాశం ఏర్పడుతుంది. అదే సమయంలో భారత ఎగుమతిదారులకు కూడా కొత్త అవకాశాలు అందుబాటులోకి వస్తాయి. అయితే ఈ ఒప్పందం దేశీయ కంపెనీలకు గట్టి పోటీని తెచ్చిపెట్టే అవకాశం ఉందని పరిశ్రమ వర్గాలు ఆందోళన వ్యక్తం చేస్తున్నాయి. ముఖ్యంగా కాస్మెటిక్స్, మద్యం, ప్రీమియం ఆహార ఉత్పత్తుల రంగాల్లో విదేశీ బ్రాండ్లతో పోటీ పెరిగే అవకాశం ఉంది.

బడ్జెట్ పై రిటైల్ గంపెడాశలు

ఈ నేపథ్యంలో రిటైల్ రంగం బడ్జెట్‌ 2026పై భారీ ఆశలు పెట్టుకుంది. పన్నులు, సుంకాలు, ప్రోత్సాహకాల్లో మార్పులు చేసి వ్యాపారాలకు సమాన అవకాశాలు కల్పించాలని కోరుతోంది. వ్యాపార నిర్వహణను సులభతరం చేయడం, వినియోగాన్ని పెంచడం, చిన్న పట్టణాల వరకు విస్తరణకు మద్దతు ఇవ్వడం వంటి అంశాలపై ప్రభుత్వం దృష్టి పెట్టాలని పరిశ్రమ ప్రతినిధులు అభిప్రాయపడుతున్నారు. అదే సమయంలో ప్రభుత్వ ఆర్థిక భారం పెరగకుండా సమతుల్యం పాటించాలని సూచిస్తున్నారు. బడ్జెట్‌ 2026లో మౌలిక సదుపాయాల అభివృద్ధికి అధిక ప్రాధాన్యం ఇవ్వాలని రిటైల్ రంగం కోరుతోంది. మెట్రో రైలు, హైవేలు, విమానాశ్రయాలు, ప్రాంతీయ రైలు మార్గాల అభివృద్ధి వల్ల మాల్స్‌, హై స్ట్రీట్లకు చేరువ మరింత మెరుగవుతుందని నిపుణులు అంటున్నారు. రవాణా కేంద్రాల చుట్టూ కొత్త వాణిజ్య కేంద్రాలు ఏర్పడే అవకాశం ఉండటంతో రిటైల్ రంగం మరింత విస్తరిస్తుందని అంచనా వేస్తున్నారు.

టైర్-2, టైర్-3 నగరాల నుంచే వృద్ధి

రాబోయే రోజుల్లో రిటైల్ రంగం వృద్ధి ప్రధానంగా టైర్-2, టైర్-3 నగరాల నుంచే వస్తుందని నిపుణులు చెబుతున్నారు. ఈ ప్రాంతాల్లో మధ్యస్థాయి షాపింగ్ మాల్స్‌, గోదాములతో కూడిన రిటైల్ కేంద్రాలు, రవాణా మార్గాలకు అనుసంధానమైన వాణిజ్య ప్రాజెక్టులకు డిమాండ్ పెరుగుతుందని అంచనా వేస్తున్నారు. ప్రజలు ఎక్కువగా ఈ ప్రాంతాలకు మారుతున్న నేపథ్యంలో అక్కడ వినియోగం కూడా పెరుగుతుందని భావిస్తున్నారు. ఇంటర్నెట్ వేగం పెంపు, 5G సేవల విస్తరణ కూడా రిటైల్ రంగానికి కీలకమని నిపుణులు అంటున్నారు. ముఖ్యంగా టైర్-2, టైర్-3 పట్టణాల్లో వేగవంతమైన డిజిటల్ కనెక్టివిటీ అందుబాటులోకి వస్తే, ఆన్‌లైన్, ఆఫ్‌లైన్ వ్యాపారాల సమన్వయం మరింత మెరుగవుతుందని పేర్కొంటున్నారు. దీని వల్ల స్టోర్లు, గోదాములు, ఈ-కామర్స్ వ్యవస్థలు కలిసి పనిచేసే ‘ఓమ్నీ ఛానల్’ మోడల్ బలపడనుంది.

అందుబాటు ధరల దుస్తులు, చెప్పులు, రోజువారీ వినియోగ వస్తువులపై GSTను కొంత తగ్గించాలని కూడా పరిశ్రమ ప్రతిపాదిస్తోంది. దీని వల్ల డిమాండ్ పెరుగుతుందని, అసంఘటిత రంగంతో పోటీ పడేందుకు సంఘటిత రిటైల్‌కు సహకరిస్తుందని నిపుణులు చెబుతున్నారు. అలాగే చిన్న పట్టణాల్లో వృద్ధికి ఇది దోహదపడుతుందని పేర్కొంటున్నారు. మాల్స్‌లో ఫిట్-అవుట్స్‌, సామూహిక ప్రాంతాలు, సేవలపై GST క్రెడిట్ విషయంలో స్పష్టత ఇవ్వాలని కూడా రిటైల్ రంగం కోరుతోంది. దీని వల్ల డెవలపర్లు, మాల్ యజమానుల ఖర్చులు తగ్గి నాణ్యత, భద్రత, స్థిరత్వంపై మరింత పెట్టుబడి పెట్టే అవకాశం ఏర్పడుతుందని చెబుతున్నారు. అదనంగా, పన్ను మినహాయింపుల పరిమితులు పెంచితే ఫ్యాషన్, ఎలక్ట్రానిక్స్, ఫుడ్ అండ్ బెవరేజెస్‌పై వినియోగం మరింత పెరిగే అవకాశం ఉందని పరిశ్రమ వర్గాలు భావిస్తున్నాయి.

మొత్తంగా చూస్తే, భారత్–EU వాణిజ్య ఒప్పందం నేపథ్యంలో రిటైల్ రంగంలో కొత్త అవకాశాలు, కొత్త సవాళ్లు రెండూ ఏర్పడుతున్నాయి. ఈ పరిస్థితుల్లో బడ్జెట్‌ 2026 పరిశ్రమకు మద్దతుగా నిలిస్తే, చిన్న నగరాల వరకు రిటైల్ విస్తరణ మరింత వేగవంతం కానుందని నిపుణులు అభిప్రాయపడుతున్నారు.