డిసెంబర్‌‌లో 6 శాతం పెరిగిన జీఎస్టీ వసూళ్లు.. రూ.1.74 లక్షల కోట్లుగా నమోదు

దిశ, వెబ్‌డెస్క్: దేశంలో జీఎస్టీ (GST) వసూళ్లు రికార్డు స్థాయికి చేరాయి. భారత ప్రభుత్వం ఇవాళ విడుదల చేసిన తాత్కాలిక డేటా ప్రకారం, డిసెంబర్ 2025లో గూడ్స్ అండ్ సర్వీసెస్ టాక్స్ (GST) సేకరణ రూ.1,74,550 కోట్లు (సుమారు రూ.1.75 లక్షల కోట్లు)గా నమోదైంది. గత సంవత్సరం డిసెంబర్‌తో పోలిస్తే వసూళ్లు 6.1 శాతం పెరిగాయి. 2025లోని కొన్ని నెలల్లో, ముఖ్యంగా సెప్టెంబర్ 22 నుంచి అమలైన జీఎస్టీ 2.0 రేటు సరళీకరణ (Rationalization) తర్వాత వృద్ధి కాస్త మందగించినట్లు కనిపించింది. అయినా డిసెంబర్ నాటికి జీఎస్టీ వసూళ్లు యథాస్థితికి వచ్చాయి. గత ఆర్థిక సంవత్సరం (2024-25)లో జీఎస్టీ సేకరణ రికార్డు స్థాయిలో రూ.22.08 లక్షల కోట్లకు చేరుకుంది. ఈ వృద్ధి భారత ఆర్థిక వ్యవస్థ బలోపేతానికి సానుకూల సంకేతమని ఆర్థిక నిపుణులు భావిస్తున్నారు.