దిగివచ్చిన ముడిచమురు ధరలు.. డాలర్‌తో పోలిస్తే పుంజుకున్న రూపాయి

దిశ, వెబ్‌డెస్క్: అంతర్జాతీయ మార్కెట్‌లో ముడిచమురు ధరలు క్షీణించడం భారత కరెన్సీ (Indian Currency)కి కలిసివచ్చింది. ఇవాళ అమెరికన్ డాలర్‌తో పోలిస్తే రూపాయి విలువ 11 పైసలు బలపడి రూ.94.65 వద్ద స్థిరపడింది. అయితే, భారత్ తన అవసరాలకు ముడిచమురును ఇతర దేశాల నుంచి భారీగా దిగుమతి చేసుకుంటుంది. చమురు ధరలు తగ్గడం వల్ల దిగుమతి వ్యయం (Import Bill) తగ్గి, డాలర్లకు డిమాండ్ కాస్త తగ్గింది. ఇది ఫారెక్స్ మార్కెట్‌లో రూపాయి విలువ పెరగడానికి ప్రధాన కారణమైంది.

అయితే, ఇవాళ ట్రేడింగ్ ప్రారంభంలోనే డాలర్‌తో పోలిస్తే రూపాయి లాభాలతో ఇంటర్‌బ్యాంక్ ఫారిన్ ఎక్స్ఛేంజ్ మార్కెట్‌లో అడుగుపెట్టింది. అంతర్జాతీయ మార్కెట్లలో డాలర్ ఇండెక్స్ ఒడిదుడుకులు, దేశీయ స్టాక్ మార్కెట్లలోకి విదేశీ పెట్టుబడుల (FII) ప్రవాహం వంటి అంశాలు కూడా రూపాయిని ప్రభావితం చేశాయి. రోజంతా సానుకూల ధోరణిలోనే సాగిన ట్రేడింగ్.. చివరకు 11 పైసల లాభంతో రూ.94.65 వద్ద ముగిసింది. గత వరుస సెషన్లలో ఒత్తిడిని ఎదుర్కొంటున్న రూపాయి.. ముడిచమురు ధరల పతనంతో తిరిగి పుంజుకోవడం పట్ల మార్కెట్ విశ్లేషకులు ఆనందం వ్యక్తం చేస్తున్నారు.