India-China: సరిహద్దులో శాంతి ఉంటేనే సంబంధాలు ముందుకు
పరస్పర గౌరవం, పరస్పర ప్రయోజనం, పరస్పర సున్నితత్వం ఆధారంగానే రెండు దేశాల మధ్య స్థిరమైన, దీర్ఘకాలిక సంబంధాలు నిర్మించవచ్చని ఆయన పేర్కొన్నారు.
దిశ, నేషనల్ బ్యూరో: ఫిలిప్పీన్స్ రాజధాని మనీలాలో చైనా విదేశాంగ మంత్రి వాంగ్ యీతో జరిగిన సమావేశంలో భారత్ తన వైఖరిని మరోసారి స్పష్టంగా వెల్లడించింది. విదేశాంగ మంత్రి ఎస్ జైశంకర్ మాట్లాడుతూ, భారత్-చైనా సంబంధాలు సాధారణ స్థితికి రావాలంటే సరిహద్దు ప్రాంతాల్లో శాంతి, ప్రశాంతత తప్పనిసరి అని చెప్పారు. పరస్పర గౌరవం, పరస్పర ప్రయోజనం, పరస్పర సున్నితత్వం ఆధారంగానే రెండు దేశాల మధ్య స్థిరమైన, దీర్ఘకాలిక సంబంధాలు నిర్మించవచ్చని ఆయన పేర్కొన్నారు. తూర్పు లద్దాఖ్లో ఉద్రిక్తతలు తగ్గిన తర్వాత సంబంధాలను మెరుగుపరిచే ప్రక్రియ కొనసాగుతున్నప్పటికీ, వాస్తవ నియంత్రణ రేఖ (ఎల్ఏసీ) వెంబడి స్థిరత్వాన్ని కొనసాగించడంపై ఇరు దేశాలు నిరంతరం దృష్టి పెట్టాల్సిన అవసరం ఉందని జైశంకర్ స్పష్టం చేశారు. రెండు దేశాల మధ్య అభిప్రాయ భేదాలు సహజమే అయినప్పటికీ, అవి వివాదాలుగా మారకుండా దౌత్యపరంగా పరిష్కరించడం ఇరు దేశాల బాధ్యత అని ఆయన అన్నారు.
భద్రతా అంశాలతో పాటు ఆర్థిక సంబంధాలపై కూడా భారత్ తన ఆందోళనలను చైనా దృష్టికి తీసుకెళ్లింది. భారత ఉత్పత్తులకు చైనా మార్కెట్లో సమాన అవకాశాలు కల్పించడం, వాణిజ్య లోటును తగ్గించడం, సరఫరా గొలుసుల్లో ఉన్న అనిశ్చితిని తొలగించడం అవసరమని జైశంకర్ పేర్కొన్నారు. ప్రత్యక్ష విమానాల పునఃప్రారంభం, వీసా సడలింపులు, కైలాస్ మానసరోవర్ యాత్ర పునఃప్రారంభం, సరిహద్దు వాణిజ్యాన్ని తిరిగి ప్రారంభించే చర్యలను భారత్ సానుకూల సంకేతాలుగా పేర్కొంది. అయితే ద్వైపాక్షిక సంబంధాలు మరింత ముందుకు సాగాలంటే సరిహద్దు శాంతితో పాటు వాణిజ్యం, ప్రజల మధ్య పరస్పర రాకపోకలు, ఇతర పెండింగ్ అంశాల్లో కూడా స్పష్టమైన పురోగతి అవసరమని భారత్ ఈ సమావేశంలో మరోసారి స్పష్టం చేసింది.
