దక్షిణ అమెరికాలో అదానీ పోర్ట్స్ అడుగు

దిశ, వెబ్ డెస్క్: భారతదేశంలో ప్రముఖ మౌలిక సదుపాయాల దిగ్గజం అదానీ పోర్ట్స్ అండ్ స్పెషల్ ఎకనామిక్ జోన్ లిమిటెడ్ (APSEZ) అంతర్జాతీయంగా మరో భారీ మైలురాయిని అందుకుంది. అర్జెంటీనా దేశపు మొట్టమొదటి లిక్విఫైడ్ నేచురల్ గ్యాస్ (LNG) ఎగుమతి ప్రాజెక్టుకు సంబంధించి 10 ఏళ్ల కాలపరిమితి గల మెరైన్ సర్వీసెస్ (సముద్ర సేవలు) కాంట్రాక్టును అదానీ గ్రూప్ కైవసం చేసుకుంది. సౌతర్న్ ఎనర్జీ ఎస్.ఏ. (SESA) అంతర్జాతీయ స్థాయిలో నిర్వహించిన పోటీ టెండర్ ప్రక్రియలో అదానీ గ్రూప్ ఈ కాంట్రాక్టును గెలుచుకుంది. ఈ భారీ ఒప్పందంతో అదానీ పోర్ట్స్ దక్షిణ అమెరికా మార్కెట్లోకి అధికారికంగా ప్రవేశించడమే కాకుండా, తన అంతర్జాతీయ సముద్ర సేవల నెట్‌వర్క్‌ను మరింత విస్తరించుకుంది.

ఈ ప్రతిష్టాత్మక కాంట్రాక్ట్ APSEZ కు చెందిన సబ్సిడరీ సంస్థ అయిన ‘ది అదానీ హార్బర్ ఇంటర్నేషనల్ FZCO’ (The Adani Harbour International FZCO) కు దక్కింది. గ్లోబల్ టెండర్ ప్రక్రియలో భాగంగా అర్జెంటీనాకు చెందిన ప్రముఖ ‘మెరిడియన్ గ్రూప్’ (Meridian Group) తో కలిసి అదానీ సంస్థ ఒక కన్సార్టియంగా ఏర్పడి ఈ విజయాన్ని అందుకుంది. అంతర్జాతీయ ఇంధన లాజిస్టిక్స్ రంగంలో కీలకమైన ఈ ప్రాజెక్ట్ ద్వారా అర్జెంటీనా నుండి ప్రపంచ దేశాలకు జరిగే ఎల్‌ఎన్‌జీ ఎగుమతుల సముద్ర రవాణా సేవలను అదానీ గ్రూప్ పర్యవేక్షించనుంది.