అర్ధరాత్రి కలుసుకున్న మైనర్లు.. ఇంతలో ప్రేయసిపై..

దిశ, వెబ్‌డెస్క్ : ఇద్దరు మైనర్లు ప్రేమించుకున్నారు. చెట్టాపట్టాలేసుకుని తిరిగారు. చివరకు పెళ్లి చేసుకోమని అడిగిన పాపానికి ప్రేయసి గొంతు నులిమి నదిలో తోసేశాడు ప్రియుడు. అనంతరం తానే ఆమెను హత్య చేశానని పోలీసుల ముందు లొంగిపోయాడు. ఈ దారుణ ఘటన ఛత్తీస్‌గఢ్‌లోని చంపా జిల్లాలో చోటుచేసుకుంది. ఈ ఘటనపై పోలీసులు తెలిపిన వివరాల ప్రకారం.. కికిర్దా గ్రామానికి చెందిన ఇద్దరు మైనర్లు స్కూల్స్‌లో చదువుతున్న నాటి నుంచే ప్రేమించుకున్నారు.

ఈ క్రమంలో శనివారం రాత్రి సమయంలో బాలికను కలవాలని ప్రియుడు పిలవడంతో ఆమె బయటకు వచ్చింది. ఈ క్రమంలో నది ఒడ్డున కూర్చున్న వారిద్దరూ కాసేపు కబుర్లు చెప్పుకున్న అనంతరం.. తనను పెళ్లి చేసుకుని ఇంటికి తీసుకువెళ్లాలని ఆమె అతడిపై ఒత్తిడి తీసుకువచ్చింది. ఆ సమయంలో అతను పెళ్లికి నిరాకరించాడు. ఈ క్రమంలో ఆగ్రహానికి లోనైన అతడు తన ప్రియురాలి గొంతు నులిమి హత్య చేశాడు. అనంతరం హత్యా నేరం నుంచి తప్పించుకోవడానికి ఆమె డెడ్ బాడీని నదిలోకి తోసేసినట్టు తెలిపారు. కానీ, మళ్లీ అతడే పోలీస్ స్టేషన్‌కు వచ్చి లొంగిపోయినట్టు పోలీసులు వెల్లడించారు. ఈ క్రమంలో పోలీసులు స్థానికుల సాయంతో నదిలో నుంచి యువతి మృతదేహాన్ని బయటకు తీశారు.