ఇక పెట్రోల్ కష్టాలకు బైబై.. మార్కెట్లోకి కొత్త కారు: ధర ఎంతంటే?

దిశ, వెబ్‌డెస్క్: భారత ఆటోమొబైల్ రంగంలో ప్రముఖ కార్ల తయారీ సంస్థ 'మారుతి సుజుకి' సరికొత్త మైలురాయిని సృష్టించింది. దేశీయ మార్కెట్లోకి అత్యంత ఆదరణ పొందిన వ్యాగన్ ఆర్ మోడల్ 'ఫ్లెక్స్ ఫ్యూయల్' (Flex Fuel) వేరియంట్‌ను కంపెనీ అధికారికంగా విడుదల చేసింది. దీని ప్రారంభ ఎక్స్-షోరూమ్ ధరను రూ.7.24 లక్షలుగా నిర్ణయించారు. పెట్రోల్‌తో పాటు ఇథనాల్ ఇంధనంతో నడిచే భారతదేశపు మొట్టమొదటి మాస్-మార్కెట్ కారుగా ఈ వ్యాగన్ ఆర్ నిలిచింది. ఇంధన దిగుమతుల భారాన్ని తగ్గించుకోవడానికి భారత ప్రభుత్వం ఇథనాల్ వాడకాన్ని ప్రోత్సహిస్తున్న నేపథ్యంలో మారుతి సుజుకి ఈ ముందడుగు వేసింది.

కమర్షియల్ విభాగంలోనే తొలి అడుగు..

ఈ వ్యాగన్ ఆర్ ఫ్లెక్స్ ఫ్యూయల్ కారును ప్రస్తుతానికి కేవలం కమర్షియల్ (ఫ్లీట్/టాక్సీ/కంపెనీల) అవసరాల కోసం మాత్రమే అందుబాటులోకి తెచ్చారు. సాధారణ ప్రైవేట్ కొనుగోలుదారులకు ఇది ఇంకా అందుబాటులోకి రాలేదు. ఈ కారు E20 (20% ఇథనాల్, 80% పెట్రోల్) నుండి ఏకంగా E85 (85% ఇథనాల్, 15% పెట్రోల్) వరకు ఎలాంటి మిశ్రమాన్నైనా సపోర్ట్ చేస్తుంది. వ్యాగన్ ఆర్ లోని టాప్-స్పెక్ వేరియంట్ అయిన ZXi+ ఆధారంగా దీనిని రూపొందించారు. ఇందులో 1.2 లీటర్ పెట్రోల్ ఇంజిన్‌ను అమర్చారు. ఇది 90bhp పవర్‌ను, 113.7Nm గరిష్ట టార్క్‌ను ఉత్పత్తి చేస్తుంది. దీనికి 5-స్పీడ్ మాన్యువల్ గేర్ బాక్స్‌ను జతచేశారు. భద్రత కోసం 6 ఎయిర్‌బ్యాగ్‌లు, 7-ఇంచుల టచ్ స్క్రీన్ ఇన్ఫోటైన్మెంట్ సిస్టమ్, స్టీరింగ్ మౌంటెడ్ కంట్రోల్స్, ఫాగ్ ల్యాంప్స్, అల్లాయ్ వీల్స్ వంటి ప్రీమియం ఫీచర్లు ఇందులో ఉన్నాయి.

ధర వ్యత్యాసం..

సాధారణ పెట్రోల్ ZXi+ మోడల్తో పోలిస్తే ఈ ఫ్లెక్స్ ఫ్యూయల్ వేరియంట్ ధర దాదాపు రూ.85,000 వరకు ఎక్కువగా ఉంది. ఇది మెటాలిక్, నాన్ మెటాలిక్ రంగుల్లో లభిస్తుంది. ప్రస్తుతానికి ఈ ఇథనాల్ (E85) ఇంధన బంకులు కేవలం ఢిల్లీ-NCR, ముంబై-నాగ్ పూర్ కారిడార్ వంటి ఎంపిక చేసిన కొన్ని ప్రాంతాలలో మాత్రమే అందుబాటులో ఉన్నాయి. అయితే, రాబోయే రోజుల్లో ఇథనాల్ నెట్వర్క్‌ను భారీగా విస్తరించాలని కేంద్ర ప్రభుత్వం ప్రణాళికలు రచిస్తోంది. రాబోయే కాలంలో దేశవ్యాప్తంగా ఇథనాల్ విక్రయ కేంద్రాల విస్తరణ వేగాన్ని బట్టే ఈ ఫ్లెక్స్ ఫ్యూయల్ వాహనాల విజయం ఆధారపడి ఉంటుందని ఆటోమొబైల్ విశ్లేషకులు భావిస్తున్నారు.