GBS: జీబీఎస్​ లక్షణాలతో మహిళ మృతి

గుంటూరు జీజీహెచ్​లో ఇది మూడో మరణం

వణికిస్తున్న గులియన్​ బారే సిండ్రోమ్​

దిశ, డైనమిక్ ​బ్యూరో: గుంటూరు ప్రభుత్వ సమగ్ర వైద్యశాలలో జీబీఎస్​(గులియన్​బారే సిండ్రోమ్)​(Guillain-Barre syndrome) లక్షణాలతో మరో మహిళ మృతి చెందింది. నాలుగు రోజుల కిందట జీబీఎస్​ లక్షణాలతో సీతామహాలక్ష్మి అనే మహిళ ఆస్పత్రిలో చేరింది. ఈ రోజు ఆమె మృతి చెందింది. అయితే వైద్య పరీక్షల నివేదిక వచ్చిన తర్వాత మరణానికి గల కారణాలు తెలుస్తాయని వైద్యులు చెబుతున్నారు. గుంటూరు జీజీహెచ్ (Guntur GGH) ​లో జీబీఎస్​లక్షణాలతో గతంలో ఒకరు మృతి చెందారు. గత ఫిబ్రవరి నెలలో ఈ వ్యాధి లక్షణాలతో చికిత్స పొందుతూ ఇద్దరు మహిళలు మృతి చెందారు. ప్రస్తుతం ఈ వ్యాధి బారిన పడి పలువురు రాష్ట్రంలోని వివిధ ప్రభుత్వ ఆస్పత్రులలో చికిత్స పొందుతున్నారు. అయితే ఈ వ్యాధి పట్ల ప్రజలు భయపడాల్సిన పనిలేదని ఆస్పత్రి వర్గాలు చెబుతున్నారు. కారణం ఇది అంటువ్యాధి కాదు. అయితే ఇది రావడానికి కారణాలు తెలియాల్సి ఉంది. ఇతర వైరల్​ఇన్​ఫెక్షన్​(viral infection) సోకి తగ్గిన వారిలో కూడా ఇది కనిపిస్తుందన్నారు. దీనికి చికిత్స ఖరీదుతో కూడుకున్నదని వైద్య ఆరోగ్యశాఖ మంత్రి సత్యకుమార్​ ప్రకటించారు. ఈ వ్యాధి సోకిన వారికి చికిత్స ఆరోగ్యశ్రీ పరిధిలోకి తీసుకువచ్చామన్నారు. వ్యాధిగ్రస్తులకు వాడే ఇంజక్షన్​ ఖరీదైనదైనా వాటిని సరిపడా అందుబాటులో ఉంచామని వెల్లడించారు. చేతులు, కాళ్లు అకస్మాత్తుగా వాపు రావడం ఈ వ్యాధి లక్షణం. నరాలు ఒక్కసారిగా చచ్చుబడిపోవడం, తీవ్రమోతాదులో పక్షవాతం కూడా వస్తుంది. చిన్నపిల్లల్లో కూడా ఈ వ్యాధి లక్షణాలు కనపడినా.. అంత ప్రమాదకరమైనది కాదని వైద్యులు చెబుతున్నారు. అయితే కాళ్లు చేతులు అకస్మాత్తుగా చచ్చుబడినట్లు అనిపిస్తే వెంటనే ఆస్పత్రికి వెళ్లాలని వైద్యులు సూచిస్తున్నారు.