అల్లూరి జిల్లా | చింతపల్లిలో 9 డిగ్రీల ఉష్ణోగ్రత నమోదు

దిశ, వెబ్ డెస్క్ : అల్లూరి సీతారామరాజు జిల్లాలోని ఏజెన్సీ ప్రాంతాలను (Agency Area) చలి పులి ఉక్కిరిబిక్కిరి చేస్తోంది. కొండ ప్రాంతాల నుంచి వీస్తున్న చల్లటి గాలుల (Cold Air) కారణంగా రోజురోజుకు ఉష్ణోగ్రతలు పడిపోతున్నాయి. ఏజెన్సీ ప్రాంతాల్లో అత్యంత శీతలంగా ఉండే చింతపల్లిలో కనిష్ట ఉష్ణోగ్రత సింగిల్ డిజిట్‌కు పడిపోవడంతో స్థానికులు చలికి వణికిపోతున్నారు. తాజాగా చింతపల్లిలో 9 డిగ్రీల సెల్సియస్ ఉష్ణోగ్రత నమోదైంది. కేవలం చింతపల్లిలోనే కాకుండా, లంబసింగి, అరకులోయ, పాడేరు, జీకే వీధి వంటి ఇతర ఏజెన్సీ మండలాల్లో కూడా కనిష్ట ఉష్ణోగ్రతలు 10 డిగ్రీల లోపు నమోదవుతున్నాయి. సముద్ర మట్టానికి సుమారు 3600 అడుగుల ఎత్తులో ఉండే ఈ ప్రాంతాల్లో, సాధారణంగా అక్టోబర్ నుంచి జనవరి మధ్య చలి తీవ్రత పెరుగుతుంది. ఈ అనూహ్య ఉష్ణోగ్రతల పతనం కారణంగా ఉదయం 10 గంటల వరకు కూడా దట్టమైన పొగమంచు కమ్ముకుంటోంది.

పొగమంచు ప్రభావం

​అల్లూరి జిల్లాలోని మన్యం ప్రాంతాలలో దట్టంగా కురుస్తున్న పొగమంచు (Fog) జనజీవనంపై తీవ్ర ప్రభావం చూపుతోంది. ముఖ్యంగా ఉదయం వేళల్లో రహదారులపై పొగమంచు కమ్మేయడంతో వాహనదారులు తీవ్ర ఇబ్బందులు పడుతున్నారు. దృష్టి గోచరత (విజిబిలిటీ) తగ్గడంతో వాహనాలు నెమ్మదిగా లైట్లు వేసుకుని ప్రయాణించాల్సిన పరిస్థితి ఏర్పడింది. ఈ చలి తీవ్రత వల్ల వృద్ధులు, చిన్నపిల్లలు ఇబ్బంది పడుతున్నారు. చలి నుంచి ఉపశమనం పొందేందుకు గిరిజనులు, స్థానికులు చలిమంటలు వేసుకుంటున్నారు. అయితే, ఈ గడ్డకట్టే చలి మరియు పొగమంచు పరిస్థితులు పర్యాటకులను మాత్రం విశేషంగా ఆకర్షిస్తున్నాయి. ఆంధ్ర కశ్మీర్‌గా పేరుగాంచిన లంబసింగి, అరకులోయ, చెరువులవెనం వంటి పర్యాటక ప్రాంతాలకు సందర్శకుల తాకిడి పెరుగుతోంది. రాబోయే రోజుల్లో ఉష్ణోగ్రతలు మరింత తగ్గే అవకాశం ఉందని వాతావరణ శాఖ అధికారులు అంచనా వేస్తున్నారు.