తిరుమల నడక మార్గంలో పులి సంచారం.. సోషల్ మీడియాలో వైరల్గా మారిన వీడియో
తిరుమల నడక మార్గంలో పులి సంచరించిందంటూ గత కొన్ని గంటలుగా సోషల్ మీడియా ప్లాట్ఫారమ్స్లో ఒక వీడియో విపరీతంగా వైరల్ అవుతోంది.
దిశ, వెబ్ డెస్క్: తిరుమల తిరుపతి కొండపైకి వెళ్లే మెట్ల మార్గంలో పులి సంచరించిందంటూ గత కొన్ని గంటలుగా సోషల్ మీడియా ప్లాట్ఫారమ్స్లో ఒక వీడియో విపరీతంగా వైరల్ అవుతోంది. ఈ వార్త ప్రచారంలోకి రావడంతో అలిపిరి, శ్రీవారి మెట్టు మార్గాల గుండా కాలినడకన కొండపైకి వెళ్లే భక్తులు తీవ్ర భయాందోళనలకు లోనవుతున్నారు. వైరల్ అవుతున్న ఆ వీడియోలో నేరుగా పులి ఎక్కడా కనిపించనప్పటికీ, దట్టమైన అటవీ ప్రాంతం కావడం, చుట్టుపక్కల ఉన్న భక్తులు భయంతో పరుగులు తీస్తుండటం స్పష్టంగా కనిపిస్తోంది. దీంతో ఈ దృశ్యాలను చూసిన నెటిజన్లు, భక్తులు తిరుమల నడక మార్గంలో భద్రతపై ఆందోళన వ్యక్తం చేస్తున్నారు.
ఈ వీడియో సోషల్ మీడియాలో వైరల్గా మారడంతో, ఒకవేళ నిజంగానే చిరుతలు, పులులు వంటి వన్యప్రాణులు నడక మార్గంలోకి వస్తే భక్తుల రక్షణ ఏమిటనే ప్రశ్నలు నెటిజన్ల నుంచి వ్యక్తమవుతున్నాయి. గతంలో జరిగిన కొన్ని వన్యప్రాణుల దాడుల ఘటనలను గుర్తుచేస్తూ.. కాలినడకన వెళ్లే భక్తుల రక్షణ కోసం టీటీడీ (TTD) ప్రత్యేక చర్యలు తీసుకోవాలని కోరుతున్నారు. నడక దారి పొడవునా అధునాతన సీసీ కెమెరాల నిఘాను మరింత పెంచాలని, అటవీ శాఖ మరియు రక్షణ సిబ్బందితో నిరంతరం పెట్రోలింగ్ నిర్వహించి తగిన భద్రతా చర్యలు చేపట్టాలని భక్తులు సామాజిక మాధ్యమాల వేదికగా విజ్ఞప్తి చేస్తున్నారు.
