ఏపీఎస్ఆర్టీసీ ఉద్యోగులకు తీపికబురు.. పొదుపు నిధుల విడుదల

దిశ, వెబ్ డెస్క్: ఏపీఎస్ఆర్టీసీ ఉద్యోగుల(APSRTC Employees)కు కూటమి ప్రభుత్వం(Government) శుభవార్త వినిపించింది. గతంలో నిలిచిపోయిన స్టాఫ్ రిటైర్మెంట్ బెనిఫిట్ స్కీమ్ (SRBS) నిధులను తిరిగి చెల్లించేందుకు నిర్ణయించింది. ఈ మేరకు రూ. 75 కోట్లను విడుదల చేసింది. 2030 మే నెల నాటికి పదవీ విరమణ పొందే సుమారు 8,450 మంది ఉద్యోగులకు ఈ నిధులు అందనున్నాయి. రిటైర్మెంట్ తర్వాత ఆర్థిక భరోసా కోసం ఉద్యోగులు తమ జీతాల నుంచి నెలనెలా పొదుపు చేసుకున్న ఈ మొత్తాన్ని వాపస్ చేసింది.

జగన్ ప్రభుత్వ హయాంలో పథకం రద్దు

వైఎస్ జగన్(YS Jagan) ప్రభుత్వ హయాంలో ఆర్టీసీని ప్రభుత్వంలో విలీనం చేసిన విషయం తెలిసిందే. అయితే ఆ సందర్భంలో ఈ SRBS పథకాన్ని రద్దు చేసింది. అయితే ఉద్యోగులు తాము దాచుకున్న సొమ్మును తమకు తిరిగి ఇవ్వాలని కూటమి ప్రభుత్వాన్ని సుదీర్ఘకాలంగా వినతులు అందజేశారు. దీంతో ఉద్యోగుల విన్నపాన్ని మన్నించి నిధులను విడుదల చేసింది. ప్రభుత్వం తీసుకున్న ఈ నిర్ణయంపై ఆర్టీసీ కార్మిక పరిషత్ నేతలు హర్షం వ్యక్తం చేశారు. నిధుల విడుదలపై సీఎం చంద్రబాబు(Cm Chandrababu), మంత్రి రాంప్రసాద్ రెడ్డి(Minister Ramprasad Reddy), ఆర్టీసీ చైర్మన్, ఎండీలకు కార్మిక సంఘాల నేతలు శేషగిరిరావు, వై. శ్రీనివాస్ తదితరులు కృతజ్ఞతలు తెలిపారు.