ప్రభుత్వానికి చుక్కెదురు.. గ్రేటర్ వార్డుల పెంపుపై స్టే

దిశ, వెబ్ డెస్క్: విశాఖ గ్రేటర్ మున్సిపల్ కార్పొరేషన్ పరిధిలో వార్డుల సంఖ్యను పెంచేందుకు ప్రభుత్వం తీసుకున్న నిర్ణయానికి హైకోర్టులో చుక్కెదురైంది. వార్డుల పునర్విభజన, పెంపు ప్రక్రియను సవాలు చేస్తూ దాఖలైన పిటిషన్‌ను విచారించిన ధర్మాసనం ఈ ప్రక్రియపై స్టే విధిస్తూ కీలక ఆదేశాలు జారీ చేసింది. ప్రభుత్వ నిర్ణయం నిబంధనలకు విరుద్ధంగా ఉందన్న వాదనలను కోర్టు పరిగణనలోకి తీసుకుంది.

శ్రీపాద రవితేజ పిటిషన్

ఈ వార్డుల పెంపును తీవ్రంగా వ్యతిరేకిస్తూ శ్రీపాద రవితేజ హైకోర్టులో ప్రజాహిత పిటిషన్ దాఖలు చేశారు. చట్టపరమైన నిబంధనలను పాటించకుండా, సరైన ప్రాతిపదిక లేకుండానే వార్డుల సంఖ్యను పెంచేందుకు అధికారులు ప్రయత్నిస్తున్నారని ఆయన తన పిటిషన్‌లో పేర్కొన్నారు. ఈ పెంపుదల వల్ల స్థానిక పరిపాలనలో గందరగోళం ఏర్పడుతుందని, తక్షణమే దీనిని నిలిపివేయాలని కోర్టును అభ్యర్థించారు.

సెలవుల ముగింపు వరకు బ్రేక్

పిటిషనర్ తరపు వాదనలను విన్న హైకోర్టు.. గ్రేటర్ మున్సిపల్ కార్పొరేషన్ వార్డుల పెంపుదలపై వేసవి సెలవులు ముగిసే వరకు స్టే విధిస్తున్నట్లు స్పష్టం చేసింది. సెలవులు పూర్తయ్యే వరకు ఎలాంటి ముందడుగు వేయవద్దని అధికారులను ఆదేశించింది. తదుపరి విచారణను వేసవి సెలవుల తర్వాతకు వాయిదా వేస్తూ కోర్టు ఉత్తర్వులు జారీ చేసింది.