ఎట్టకేలకు క్షమాపణలు చెప్పిన స్టాండప్ కమెడియన్ అనుదీప్.. ఏమన్నాడంటే?

దిశ, డైనమిక్ బ్యూరో: స్టాండప్ కామెడీ పేరుతో సినీ, రాజకీయ ప్రముఖులపై అభ్యంతరకర వ్యాఖ్యలు చేసిన కమెడియన్ అనుదీప్ కటికాల ఎట్టకేలకు దిగివచ్చారు. ఏపీ డిప్యూటీ సీఎం పవన్ కల్యాణ్, నిహారికల వ్యక్తిగత జీవితాలపై ఆయన చేసిన వ్యాఖ్యలు తీవ్ర దుమారం రేపిన విషయం తెలిసిందే. పవన్ కల్యాణ్, కొణిదెల నిహారిక విడాకుల అంశాన్ని ప్రస్తావిస్తూ చేసిన వ్యాఖ్యలపై అభిమానుల నుంచి తీవ్ర ఆగ్రహావేశాలు వ్యక్తం కావడంతో ఆయన సోషల్ మీడియా వేదికగా క్షమాపణలు చెబుతూ తాజాగా ఓ వీడియోను విడుదల చేశారు.

క్లబ్ వద్ద అభిమానుల ఆందోళన..

అనుదీప్ వ్యాఖ్యలపై ఆగ్రహించిన మెగా అభిమానులు హైదరాబాద్‌లోని ‘ది స్ట్రీట్ కామెడీ క్లబ్’ వద్దకు చేరుకుని ఆందోళనకు దిగారు. లోపలికి వెళ్లి అనుదీప్ కోసం గాలించగా.. పరిస్థితి గ్రహించిన ఆయన ఫోన్ స్విచ్ ఆఫ్ చేసుకుని అక్కడి నుంచి పారిపోయారు. ఈ వివాదం కారణంగా జూబ్లీహిల్స్, మాదాపూర్, సోమాజిగూడ తదితర ప్రాంతాల్లోని ప్రధాన కామెడీ క్లబ్‌లలో షోలు తాత్కాలికంగా నిలిచిపోయాయి.

పోలీసులకు ఫిర్యాదు..

మరోవైపు అనుదీప్‌పై జనసేన శ్రేణులు చట్టపరమైన చర్యలకు ఉపక్రమించాయి. జనసేన రాష్ట్ర కార్యదర్శి ఆకేపాటి సుభాషిణి ఆధ్వర్యంలో తిరుపతి జిల్లా ఎస్పీకి ఫిర్యాదు చేశారు. పబ్లిసిటీ కోసం బాధ్యతాయుతమైన పదవిలో ఉన్న పవన్ కల్యాణ్ వ్యక్తిగత జీవితాన్ని కించపరిచిన అనుదీప్‌పై కఠిన చర్యలు తీసుకోవాలని డిమాండ్ చేశారు.

ఎవరినీ కించపరచాలనే ఉద్దేశం లేదు : అనుదీప్

అభిమానుల ఆందోళన, చట్టపరమైన ఇబ్బందులు వస్తాయన్న భయంతో అనుదీప్ తాజాగా వీడియో ద్వారా స్పందించారు. ఎవరినీ కించపరచాలన్నది తన ఉద్దేశం కాదని, తన మాటల వల్ల ఎవరైనా బాధపడి ఉంటే క్షమించాలని కోరారు. ఈ ఘటన భవిష్యత్తులో పునరావృతం కాకుండా జాగ్రత్త పడతానని వీడియోలో పేర్కొన్నారు. అయితే, కేవలం టికెట్ల కోసం, చౌకబారు పబ్లిసిటీ కోసం హద్దులు దాటితే పరిణామాలు తీవ్రంగా ఉంటాయని నెటిజన్లు, అభిమానులు హెచ్చరిస్తున్నారు.