సీఐ నాగరాజును కస్టడీలోకి తీసుకున్న సిట్.. 8 రోజుల పాటు విచారణ

దిశ, వెబ్ డెస్క్: సాయి కృష్ణ మిస్సింగ్ కేసులో కృష్ణలంక సీఐ నాగరాజును ప్రత్యేక విచారణ బృందం (SIT) ఈరోజు (శుక్రవారం) తన కస్టడీలోకి తీసుకోనుంది. ఈ కేసు రాష్ట్ర వ్యాప్తంగా సంచలనంగా మారడంతో ప్రభుత్వం వెంటనే సిట్ ను ఏర్పాటు చేసిన విషయం తెలిసిందే. అయితే సాయి కృష్ణ లాకప్ డెత్ లో ప్రాణాలు కోల్పోయినట్లు సిట్ అధికారులు గుర్తించారు. అయితే అతని మృతదేహం ఏమైందో మాత్రం ఇప్పటి వరకు తెలియరాలేదు. దీంతో ఈ కేసులో ప్రధాన నిందితుడిగా ఆరోపణలు ఎదుర్కొంటున్న సీఐ నాగరాజును విచారించేందుకు సిట్ అధికారులు కస్టడీకి అనుమతి కోరగా.. కోర్టు 8 రోజుల విచారణకు అనుమతి ఇచ్చింది. దీంతో ఈ కేసులో సంచలన నిజాలను వెలికితీసేందుకు సిట్ అధికారులు రంగంలోకి దిగారు.

సాయికృష్ణ కేసుకు సంబంధించి పోలీస్ స్టేషన్‌కు పిలిపించి సిఐ నాగరాజు తీవ్రంగా వేధించినట్లు ఆరోపణలు ఉన్నాయి. ఈ నేపథ్యంలోనే సిట్ అధికారులు సీఐ నాగరాజును రహస్య ప్రాంతానికి తరలించి విచారించనున్నారు. స్టేషన్‌లోని సీసీటీవీ (CCTV) ఫుటేజీని ఎందుకు డిలీట్ చేశారు? ఆధారాలను ఎవరు ధ్వంసం చేయమన్నారు? అనే కీలకాంశాలపై సిట్ అధికారులు సీఐ నాగరాజు నుంచి వివరాలు రాబట్టనున్నారు. ఈ 8 రోజుల కస్టడీ విచారణ ముగిసిన అనంతరం నివేదికను సిట్ బృందం కోర్టుకు సమర్పించనుంది.