ఏపీ ప్రభుత్వం కీలక నిర్ణయం.. రాష్ట్రంలో జోనల్ వ్యవస్థ ఏర్పాటుకు ప్రణాళికలు
ఆంధ్రప్రదేశ్ ప్రభుత్వం రాష్ట్రంలో సమగ్ర అభివృద్ధి చేసేందుకు కీలక నిర్ణయం తీసుకుంది. ముఖ్యమంత్రి చంద్రబాబు నాయుడు సారథ్యంలో పరిపాలన, అభివృద్ధి వికేంద్రీకరణ లక్ష్యంగా రాష్ట్రాన్ని మూడు ప్రధాన జోన్లుగా విభజించాలని తీర్మానించినట్లు తెలుస్తుంది.
దిశ, వెబ్ డెస్క్: ఆంధ్రప్రదేశ్ ప్రభుత్వం రాష్ట్రంలో సమగ్ర అభివృద్ధి చేసేందుకు కీలక నిర్ణయం తీసుకుంది. ముఖ్యమంత్రి చంద్రబాబు నాయుడు సారథ్యంలో పరిపాలన, అభివృద్ధి వికేంద్రీకరణ లక్ష్యంగా రాష్ట్రాన్ని మూడు ప్రధాన జోన్లుగా విభజించాలని తీర్మానించినట్లు తెలుస్తుంది. ఈ మూడు జోన్లు విశాఖ, అమరావతి, రాయలసీమగా ఉండనున్నాయి. ఈ నిర్ణయం రాష్ట్రంలోని అన్ని ప్రాంతాల సమాన, సమతుల్య వృద్ధికి దోహదపడుతుందని ప్రభుత్వం భావిస్తోంది. ఈ కొత్త జోనల్ వ్యవస్థ ద్వారా ప్రణాళికలు మరింత సమర్థవంతంగా అమలు అయ్యే అవకాశం ఉన్నట్లు తెలుస్తోంది. తద్వారా స్థానిక అవసరాలకు అనుగుణంగా వనరులను కేటాయించడానికి వీలవుతుందని అధికారులు అంచనా వేస్తున్నారు.
పరిపాలనా సౌలభ్యం కోసం, ఈ మూడు జోన్లను జిల్లాలుగా విభజించాలని నిర్ణయించారు. విశాఖ జోన్లో 9 జిల్లాలు, రాయలసీమ జోన్లో 9 జిల్లాలు, అమరావతి జోన్లో 8 జిల్లాలను చేర్చారు. ఈ వ్యవస్థను సమర్థవంతంగా నిర్వహించడానికి, ప్రతి జోన్కు ఒక సీనియర్ ఐఏఎస్ అధికారిని సీఈఓగా (చీఫ్ ఎగ్జిక్యూటివ్ ఆఫీసర్) నియమించనున్నారు. విశాఖ జోన్కు సీఈఓగా యువరాజ్, అమరావతి జోన్కు సీఈఓగా మీనా, రాయలసీమ జోన్కు సీఈఓగా కృష్ణబాబు కన్ఫామ్ అయినట్లు సమాచారం. ఈ సీఈఓలు తమ జోన్లలో అభివృద్ధి పనుల పర్యవేక్షణ, వనరుల సమీకరణ, నిర్ణీత లక్ష్యాలను చేరుకోవడానికి కృషి చేస్తారు.
ఈ కీలకమైన జోనల్ వ్యవస్థ ఏర్పాటుకు సంబంధించిన ప్రణాళికలను నీతి ఆయోగ్ (NITI Aayog), సింగపూర్ దేశానికి చెందిన ప్రముఖ సంస్థల ఆధ్వర్యంలో రూపొందిస్తున్నారు.ఇది ఈ ప్రాజెక్టు యొక్క ప్రామాణికత, ఆధునిక విధానాలను సూచిస్తుంది. పనుల పురోగతిని, అమలు తీరును ఎప్పటికప్పుడు పర్యవేక్షించడానికి, విధాన నిర్ణయాలను వేగవంతం చేయడానికి, ముఖ్యమంత్రి చంద్రబాబు సారథ్యంలో ఒక స్టీరింగ్ కమిటీని కూడా ఏర్పాటు చేశారు. ప్రభుత్వం తీసుకున్న ఈ నూతన పరిపాలనా సంస్కరణలపై ఉత్తర్వులు ఒకటి, రెండు రోజుల్లో అధికారికంగా వెలువడనున్నట్లు తెలుస్తోంది.
