శ్రీకాకుళంలో భారీ తిమింగలం

దిశ, డైనమిక్ బ్యూరో : శ్రీకాకుళం జిల్లా సంతబొమ్మాలి మండలంలోని భావనపాడు సముద్రతీరానికి భారీ తిమింగలం మృతదేహం కొట్టుకువచ్చింది. శుక్రవారం ఉదయం సముద్ర వేటకు వెళ్తున్న మత్స్యకారులు ఈ మృతదేహాన్ని గమనించారు. భారీ తిమింగలం చనిపోయి ఉండటంతో దాని గురించి అటవీ శాఖ అధికారులకు ఫోన్ చేసి సమాచారం అందించారు. ఈ తిమింగలం దాదాపు 15 మీటర్లు పొడవు, పది టన్నుల బరువు ఉంటుందని మత్స్యకారులు అంచనా వేస్తున్నారు. ఈ తిమింగలం సముద్రంలోనే మృతి చెంది ఒడ్డుకు చేరిందని.. దుర్వాసన రావడంతో తాము గమనించి అటవీశాఖ అధికారులకు తెలియజేసినట్లు మత్స్యకారులు తెలిపారు. ఘటనా స్థలానికి చేరుకున్న అటవీ శాఖ అధికారులు భారీ తిమింగలం మృతికి గల కారణాలపై ఆరా తీస్తున్నారు.