రాష్ట్ర రాజకీయాల్లో విషాదం.. మాజీ మంత్రి కన్నుమూత

దిశ, వెబ్‌డెస్క్: ఆంధ్రప్రదేశ్ రాజకీయాల్లో విషాదం నెలకొంది. తెలుగుదేశం పార్టీ సీనియర్ నాయకులు, మాజీ మంత్రి అప్పల నరసింహరాజు (82) కన్నుమూశారు. గత కొంతకాలంగా అనారోగ్యంతో బాధపడుతున్న ఆయన, విశాఖ జిల్లా పద్మనాభం మండలం పాండ్రంగిలోని తన నివాసంలో బుధవారం తెల్లవారుజామున తుదిశ్వాస విడిచారు. ఆయన మృతితో భీమిలి నియోజకవర్గంతో పాటు జిల్లా వ్యాప్తంగా విషాద ఛాయలు అలముకున్నాయి.

నాలుగు సార్లు ఎమ్మెల్యేగా విజయం

అప్పల నరసింహరాజు రాజకీయ ప్రస్థానం అత్యంత సుదీర్ఘమైనది. భీమునిపట్నం (భీమిలి) నియోజకవర్గం నుంచి ఆయన అప్రతిహత విజయాలను అందుకున్నారు. 1985, 1989, 1994, మరియు 1999 ఎన్నికల్లో వరుసగా టీడీపీ అభ్యర్థిగా పోటీ చేసి ఎమ్మెల్యేగా గెలుపొందారు. దివంగత ముఖ్యమంత్రి నందమూరి తారక రామారావు (NTR) హయాంలో ఆయన మంత్రిగా పనిచేశారు. నియోజకవర్గ అభివృద్ధిలోనూ, పార్టీ బలోపేతంలోనూ ఆయన పోషించిన పాత్ర చిరస్మరణీయం.

అప్పల నరసింహరాజు మృతి పట్ల రాజకీయ ప్రముఖులు, టీడీపీ శ్రేణులు తీవ్ర దిగ్భ్రాంతి వ్యక్తం చేశాయి. క్రమశిక్షణ గల నాయకుడిగా, ప్రజల మనిషిగా పేరు తెచ్చుకున్న ఆయన మరణం పార్టీకి తీరని లోటని పలువురు నేతలు సంతాపం ప్రకటించారు. ఆయన కుటుంబ సభ్యులకు తమ ప్రగాఢ సానుభూతిని తెలిపారు. నేడు పాండ్రంగిలో ఆయన అంత్యక్రియలు నిర్వహించే అవకాశం ఉంది.