ఉయ్యూరులో అగ్నిప్రమాదం.. సామాగ్రి దగ్ధం

దిశ, వెబ్ డెస్క్ : కృష్ణా జిల్లా (Krishna District) ఉయ్యూరు (Vuyyuru) మండలంలో ఘోర అగ్నిప్రమాదం (Fire Accident) సంభవించింది. స్థానిక సర్వీస్ రోడ్డులో ఉన్న ఒక పరుపుల దుకాణంలో ఒక్కసారిగా మంటలు చెలరేగడంతో భారీగా ఆస్తినష్టం వాటిల్లిందని తెలుస్తోంది. ఉయ్యూరు మండలం గండిగుంట పరిధిలోని స్వప్నచాతుర్యా ఎంటర్ ప్రైసెస్ (Swapna Chaturya Enterprises) అనే పరుపుల విక్రయ కేంద్రంలో ఈ ఘటన చోటుచేసుకుంది. దుకాణం నుంచి పెద్ద ఎత్తున పొగలు, మంటలు ఎగిసిపడటంతో స్థానికులు తీవ్ర భయాందోళనకు గురయ్యారు.

ప్రమాదం జరిగిన వెంటనే అప్రమత్తమైన స్థానికులు అగ్నిమాపక సిబ్బందికి సమాచారం అందించారు. ఘటనా స్థలానికి చేరుకున్న ఫైర్ సిబ్బంది స్థానికుల సహాయంతో శ్రమించి మంటలను అదుపులోకి తెచ్చారు. అయితే మంటలు వేగంగా వ్యాపించడంతో దుకాణంలో ఉన్న పరుపులు, ఫర్నిచర్ తో పాటు ఫర్నిచర్ తయారీకి ఉపయోగించే సామాగ్రి పూర్తిగా కాలి బూడిదయ్యాయి. ఈ ప్రమాదంలో సుమారు రూ.3 లక్షలకు పైగా ఆస్తి నష్టం సంభవించినట్లు యజమాని ఆవేదన వ్యక్తం చేస్తున్నారు.

పోలీసుల ప్రాథమిక సమాచారం ప్రకారం.. ఈ అగ్నిప్రమాదానికి షార్ట్ సర్క్యూట్ కారణమని అనుమానిస్తున్నారు. దుకాణంలోని విద్యుత్ వైర్లలో మంటలు చెలరేగి పరుపులకు అంటుకోవడంతో క్షణాల్లోనే మంటలు తీవ్రరూపం దాల్చినట్లు తెలుస్తోంది. ప్రమాద సమయంలో దుకాణంలో ఎవరూ లేకపోవడంతో ప్రాణనష్టం తప్పిందని అధికారులు భావిస్తున్నారు. పోలీసులు కేసు నమోదు చేసుకుని దర్యాప్తు జరుపుతున్నారు.

నిత్యం రద్దీగా ఉండే సర్వీస్ రోడ్డు పక్కనే ఉన్న దుకాణంలో ఇలాంటి ప్రమాదం జరగడం ఆ ప్రాంత వాసులను కలవరానికి గురిచేసింది. తయారీ సామాగ్రితో పాటు విక్రయానికి సిద్ధంగా ఉన్న విలువైన ఫర్నిచర్ అంతా అగ్నికి ఆహుతి కావడంతో వ్యాపారికి తీవ్ర నష్టం వాటిల్లిందని తెలుస్తోంది. అధికారులు నష్టాన్ని అంచనా వేస్తున్నారని సమాచారం.

అయితే ఎండా కాలం కూడా సమీపిస్తోంది. ఈ తరుణంలో అగ్నిప్రమాదాలు పెరిగే అవకాశం ఉన్నట్లు అనుమానాలు బలపడుతున్నాయి. వ్యాపార, వాణిజ్య సముదాయాలు, గోదాంలలో అగ్ని ప్రమాదాలు అధికంగా జరిగే అవకాశాలున్నాయి. మరి ఆయా ప్రాంతాల్లో సరైన అగ్నిమాపక పరికరాలు ఉన్నాయా లేవా అనే అనుమానాలు కలుగుతున్నాయి. చలి కాలంలోనే మంటలు ఇంత విస్తరిస్తుంటే.. ఎండా కాలం ఆ ప్రభావం మరింత తీవ్రంగా ఉంటుందనే అభిప్రాయాలు వ్యక్తమవుతున్నాయి. ఇప్పటికైనా అగ్నిప్రమాదాల నివారణకు అధికారులు తనిఖీలను విస్తృతం చేయాలని ప్రజల నుంచి డిమాండ్లు వినిపిస్తున్నాయి.