గంగాలమ్మ వార్షిక మహోత్సవాలకు సర్వం సిద్ధం

దిశ, వెబ్ డెస్క్ : పశ్చిమ గోదావరి జిల్లా నరసాపురం (Narasapuram) మండలం ఎల్బీచర్ల గ్రామంలో కొలువైన శ్రీ గంగాలమ్మ అమ్మవారి (Sri Gangalamma) 11వ వార్షిక మహోత్సవాలకు సర్వం సిద్ధమైంది. నేటి నుంచి ఈ నెల 18వ తేదీ వరకు అత్యంత వైభవంగా ఈ ఉత్సవాలు జరగనున్నాయని ఆలయ కమిటీ సభ్యులు తెలిపారు. ఈ ఉత్సవాలు నేడు అమ్మవారిని 'నిలబెట్టడం' (ప్రతిష్ఠాత్మక ఆచార కార్యక్రమం) తో అత్యంత భక్తిశ్రద్ధల మధ్య ప్రారంభం కానున్నాయి. పది రోజుల పాటు జరిగే ఈ ఉత్సవాల్లో భాగంగా ప్రతిరోజూ అమ్మవారికి ప్రత్యేక పూజలు, అభిషేకాలు, వివిధ అలంకార సేవలు నిర్వహించనున్నారు. గ్రామస్తులందరూ ఏకమై గ్రామ దేవత పండుగను ఘనంగా జరుపుకోనున్నారని ఆలయ కమిటీ సభ్యులు పేర్కొన్నారు.

​ఈ ఉత్సవాల్లో ప్రధాన ఘట్టమైన 'అమ్మవారి సంబరం' ఈ నెల 17వ తేదీన నిర్వహించనున్నారని తెలిపారు. ఆ రోజు గ్రామ వీధుల్లో అమ్మవారి ఊరేగింపు, సాంస్కృతిక కార్యక్రమాలు అలరించనున్నాయని వివరించారు. అనంతరం 18వ తేదీన భారీ ఎత్తున 'అన్న సమారాధన' కార్యక్రమాన్ని ఏర్పాటు చేయనున్నామని పేర్కొన్నారు. ఈ వార్షిక మహోత్సవాలకు ఎల్బీచర్ల నుంచే కాకుండా చుట్టుపక్కల గ్రామాల నుంచి కూడా భక్తులు భారీగా తరలివస్తారని తెలియజేశారు. భక్తులకు ఎటువంటి ఇబ్బందులు కలగకుండా ఆలయ కమిటీ అన్ని ఏర్పాట్లు పూర్తి చేసిందన్నారు. ఈ పది రోజుల పాటు గ్రామంలో ఆధ్యాత్మిక వాతావరణం నెలకొననుందని వెల్లడించారు.