రాజమండ్రి కల్తీపాలు, వేట్లపాలెం బాణసంచా ఘటనల్లో పెరిగిన మృతుల సంఖ్యలు

దిశ, వెబ్‌డెస్క్: రాజమండ్రి కల్తీపాల ఘటనలో మరో వ్యక్తి మరణించాడు. చౌడేశ్వరి నగర్ కు చెందిన జి.సూర్యారావు (81) కల్తీపాలు తాగడంతో అస్వస్థతకు గురై ఆస్పత్రి పాలయ్యాడు. మంగళవారం మధ్యాహ్నం ఆస్పత్రిలో చికిత్స పొందుతున్న సూర్యారావు మరణించినట్లు వైద్యులు ప్రకటించారు. నిన్న కూడా ఒక వ్యక్తి మరణించిన విషయం తెలిసిందే. తాజాగా నమోదైన మరణంతో కల్తీపాల ఘటనలో మృతుల సంఖ్య 8కి పెరిగింది. ప్రస్తుతం ఇంకా 13 మంది కల్తీపాల బాధితులు ఆస్పత్రుల్లోనే చికిత్స పొందుతున్నారు.

వేట్లపాలెం ఘటనలో 23కి చేరిన మృతులు

మరోవైపు కాకినాడ జిల్లా వేట్లపాలెంలో ఫిబ్రవరి 28న బాణసంచా తయారీకేంద్రంలో జరిగిన పేలుడు ఘటనలో మృతుల సంఖ్య పెరిగింది. ప్రమాద సమయంలో స్పాట్లోనే 20 మంది సజీవదహనం అవ్వగా.. పలువురు తీవ్రగాయాలతో ఆస్పత్రుల పాలయ్యారు. ఆ తర్వాత మరో ఇద్దరు మరణించడంతో మృతుల సంఖ్య 22కి చేరింది. తాజాగా మరో వ్యక్తి మృతి చెందడంతో మృతుల సంఖ్య 23కి చేరింది. కాకినాడ జీజీహెచ్ లో చికిత్స పొందుతున్న వేమగిరి లోవరాజు (38) మరణించినట్లు వైద్యులు తెలిపారు. కాగా.. వేట్లపాలెం ఘటన మిగిల్చిన విషాదంలో పదులసంఖ్యలో కుటుంబాలు రోడ్డున పడ్డాయి. భర్తలను కోల్పోయిన భార్యలు, తల్లిదండ్రుల్ని కోల్పోయిన పిల్లలు అనాధలయ్యారు. బాధితుల ఒక్కొక్క కుటుంబానికి రాష్ట్ర ప్రభుత్వం రూ.20 లక్షల చెక్కులను అందజేసింది.