మహిళా రిజర్వేషన్ బిల్లుకు మద్దతివ్వండి : అన్ని పార్టీలకు సీఎం లేఖ

దిశ, వెబ్‌డెస్క్: చట్టసభల్లో మహిళలకు 33 శాతం రిజర్వేషన్లు కల్పించే 'నారీ శక్తి వందన్ అధినియం' చట్టం అమలు దిశగా ఆంధ్రప్రదేశ్ ముఖ్యమంత్రి చంద్రబాబు నాయుడు కీలక అడుగు వేశారు. ఈ చారిత్రక నిర్ణయానికి రాజకీయాలకు అతీతంగా మద్దతు తెలపాలని కోరుతూ ఆయన మంగళవారం రాష్ట్రంలోని అన్ని పార్టీల అధ్యక్షులకు, పార్లమెంట్ సభ్యులకు (లోక్‌సభ, రాజ్యసభ) బహిరంగ లేఖ రాశారు. 2029 ఎన్నికల నుంచే ఈ రిజర్వేషన్లను అమల్లోకి తీసుకురావాలన్న ప్రధాని నరేంద్ర మోదీ సంకల్పానికి అందరూ కలిసికట్టుగా మద్దతు ఇవ్వాలని ఆయన విజ్ఞప్తి చేశారు.

ప్రజాస్వామ్య చరిత్రలో అపూర్వ ఘట్టం

ఈ నెల 16న పార్లమెంటులో మహిళా రిజర్వేషన్ సవరణ బిల్లును ప్రవేశపెట్టడం భారత ప్రజాస్వామ్య వ్యవస్థలో ఒక మైలురాయిగా నిలిచిపోతుందని చంద్రబాబు తన లేఖలో పేర్కొన్నారు. మహిళా సాధికారతపై గతంలో జరిగిన సుదీర్ఘ చర్చలు, వ్యక్తమైన ఏకాభిప్రాయాలను ఈ సందర్భంగా ఆయన గుర్తు చేశారు. ప్రధాని మోదీ ఆకాంక్ష మేరకు, వచ్చే 2029 లోక్‌సభ మరియు అసెంబ్లీ ఎన్నికల్లోనే మహిళలకు రిజర్వేషన్లు వర్తించేలా అందరూ ఏకగ్రీవంగా మద్దతు పలకాలని ఆయన కోరారు.

రాజకీయాలకు అతీతంగా.. ఆడబిడ్డల గౌరవం కోసం

మహిళా రిజర్వేషన్ అంశం కేవలం రాజకీయాలకు సంబంధించింది కాదని, ఇది దేశ గౌరవానికి చిహ్నమని చంద్రబాబు స్పష్టం చేశారు. "మన ఇంటి ఆడబిడ్డలను, దేశ నారీ శక్తిని గౌరవించుకునే ఈ పవిత్ర ఘట్టంలో ప్రతి ఒక్కరూ భాగస్వాములు కావాలి. దేశవ్యాప్తంగా ఉన్న కోట్లాది మంది మహిళల తరపున బాధ్యతాయుతమైన సోదరుడిగా నేను ఈ లేఖ రాస్తున్నాను" అని ఆయన భావోద్వేగంగా పేర్కొన్నారు. ఈ చారిత్రక నిర్ణయంలో ప్రతి రాజకీయ పార్టీ, ప్రతి ఎంపీ తమ వంతు పాత్ర పోషించి చరిత్రలో భాగం కావాలని ఆయన హితవు పలికారు.

నారీ శక్తితోనే దేశాభివృద్ధి సాధ్యం

పరిపాలనలో మరియు చట్టసభల్లో మహిళల భాగస్వామ్యం పెరిగినప్పుడే నిజమైన సామాజిక ప్రగతి సాధ్యమవుతుందని ముఖ్యమంత్రి బలంగా ఆకాంక్షించారు. 'నారీ శక్తి వందన్ అధినియమ్' అనేది కేవలం ఒక చట్టం మాత్రమే కాదని, అది యావత్ భారతదేశ ఉన్నతికి బాటలు వేస్తుందని వివరించారు. భరతమాతను పూజించే ఈ గడ్డపై, 140 కోట్ల మంది భారతీయులు నారీ శక్తికి వందనం పలికే సమయం ఆసన్నమైందని, ఈ విజయంలో కేంద్ర ప్రభుత్వానికి మరియు ప్రధాని మోదీకి సంపూర్ణ సహకారం అందించాలని చంద్రబాబు విజ్ఞప్తి చేశారు.