తెలుగు జాతి ఖ్యాతి.. పద్మ పురస్కార గ్రహీతలకు సీఎం చంద్రబాబు అభినందనలు
దేశవ్యాప్తంగా పద్మ పురస్కారాలకు ఎంపికైన ప్రముఖులకు ఆంధ్రప్రదేశ్ ముఖ్యమంత్రి నారా చంద్రబాబు నాయుడు హృదయపూర్వక అభినందనలు తెలిపారు.
దిశ, డైనమిక్ బ్యూరో: దేశవ్యాప్తంగా పద్మ పురస్కారాలకు ఎంపికైన ప్రముఖులకు ఆంధ్రప్రదేశ్ ముఖ్యమంత్రి నారా చంద్రబాబు నాయుడు హృదయపూర్వక అభినందనలు తెలిపారు. ఈ ఏడాది ప్రతిష్టాత్మక పద్మ అవార్డుల్లో 13 మంది తెలుగు ప్రముఖులకు చోటు దక్కడం పట్ల ఆయన ప్రత్యేకంగా హర్షం వ్యక్తం చేశారు. ఇది తెలుగు జాతికి గర్వకారణమని ఆయన కొనియాడారు. వివిధ రంగాల్లో విశేష సేవలు అందించి, ఈ పురస్కారాలకు ఎంపికైన వారిని ఉద్దేశించి ముఖ్యమంత్రి ఆదివారం ఒక ప్రకటన విడుదల చేశారు.
పురస్కార గ్రహీతలు వీరే..
ముఖ్యమంత్రి తన సందేశంలో పలువురు ప్రముఖులను పేరుపేరునా అభినందించారు..
పద్మభూషణ్: ప్రముఖ క్యాన్సర్ వైద్య నిపుణులు డాక్టర్ నోరి దత్తాత్రేయుడు.
పద్మశ్రీ: యూజీసీ మాజీ ఛైర్మన్ మామిడాల జగదీశ్ కుమార్.
కళా రంగం: ప్రముఖ సినీ నటులు గద్దె బాబూ రాజేంద్ర ప్రసాద్, మాగంటి మురళీ మోహన్, మరియు కూచిపూడి నృత్యకారిణి దీపికారెడ్డి.
వైద్య రంగం: పాల్కొండ విజయ్ ఆనంద్ రెడ్డి, గూడూరు వెంకట్రావు.
సైన్స్ అండ్ ఇంజనీరింగ్: కృష్ణమూర్తి బాల సుబ్రహ్మణియన్, డాక్టర్ కుమారస్వామి తంగరాజ్, గడ్డమనుగు చంద్రమౌళి.
సాహిత్యం: వెంపటి కుటుంబ శాస్త్రి.
ఇతర రంగాలు: పశుసంవర్ధక, పాడి పరిశ్రమ విభాగంలో రామారెడ్డి మామిడి (మరణానంతరం), కళా రంగం నుంచి గరిమెళ్ల బాలకృష్ణ ప్రసాద్ (మరణానంతరం)లకు అభినందనలు తెలిపారు.
స్ఫూర్తిదాయకం..
‘తెలుగు రాష్ట్రాల నుంచి ఇంతమంది ప్రతిభావంతులకు ఈ గౌరవం దక్కడం నాకెంతో ఆనందాన్ని కలిగించింది. వీరి సేవలు, కృషి సమాజానికి, ముఖ్యంగా యువతకు స్ఫూర్తిదాయకం. తెలుగు జాతి ఖ్యాతి ప్రపంచవ్యాప్తంగా మరింతగా వెలుగొందాలని ఆకాంక్షిస్తున్నాను’ అని సీఎం చంద్రబాబు తన ప్రకటనలో పేర్కొన్నారు.
