నీరు ఉంటేనే నాగరికత.. చరిత్ర: సీఎం చంద్రబాబు నాయుడు

దిశ, వెబ్ డెస్క్: అంతర్రాష్ట్రాల సహకారానికి సరికొత్త ప్రతీకగా నిలుస్తూ కర్ణాటకలోని తుంగభద్ర జలాశయం 33 నూతన క్రస్ట్ గేట్ల ప్రారంభోత్సవ వేడుక గురువారం (జూన్ 25, 2026) మునీరాబాద్ వద్ద అత్యంత వైభవంగా జరిగింది. కేంద్ర జలశక్తి శాఖ మంత్రి సి.ఆర్. పాటిల్, ఆంధ్రప్రదేశ్ ముఖ్యమంత్రి నారా చంద్రబాబు నాయుడు, తెలంగాణ సీఎం ఎ. రేవంత్ రెడ్డి, కర్ణాటక ముఖ్యమంత్రి డి.కె. శివకుమార్ ఒకే వేదికపై చేరి చారిత్రాత్మక రీతిలో ఈ నూతన గేట్లను ప్రారంభించారు. గత ఏడాది భారీ వరదల వల్ల డ్యామ్ 19వ నంబర్ గేట్ కొట్టుకుపోయిన ఘటనను సవాల్‌గా తీసుకుని, ఎన్డీఎస్ఏ (NDSA) సిఫార్సుల మేరకు సుమారు రూ. 51 కోట్ల వ్యయంతో కేవలం ఆరు నెలల రికార్డు కాలంలోనే పాత గేట్ల స్థానంలో ఈ 33 సరికొత్త గేట్లను విజయవంతంగా అమర్చారు.

ఈ సందర్భంగా ఏర్పాటు చేసిన బహిరంగ సభలో ఏపీ సీఎం చంద్రబాబు నాయుడు మాట్లాడుతూ.. కీలక వ్యాఖ్యలు చేశారు. మూడు రాష్ట్రాల ఉమ్మడి ప్రయోజనార్థం రికార్డు సమయంలో ఈ ప్రాజెక్టును పూర్తి చేసినందుకు కేంద్రమంత్రితో పాటు కర్ణాటక, తెలంగాణ ప్రభుత్వాలకు ఆయన ప్రత్యేక అభినందనలు తెలిపారు. "నీరు ఉంటేనే చరిత్ర.. నీరు ఉంటేనే నాగరికత. జల వనరుల సంరక్షణ, సరైన నీటి యాజమాన్యం అనేది మనందరి ఉమ్మడి బాధ్యత" అని ఆయన దేశ ప్రజలకు పిలుపునిచ్చారు. 70 ఏళ్లకు పైగా చరిత్ర కలిగిన తుంగభద్ర జలాశయం రాయలసీమను కరువు కోరల నుండి కాపాడుతోందని, ఈ ప్రాజెక్ట్ లేకపోతే అక్కడ కరువు తాండవిస్తుందని గుర్తు చేశారు. నీటి విలువ తెలిసిన వ్యక్తిగా తాను గతంలోనే మొత్తం గేట్లను మార్చాలని కర్ణాటక సీఎం డీకే శివకుమార్‌ను కోరానని, ఆయన కూడా తక్షణమే స్పందించి యుద్ధప్రాతిపదికన పనులు పూర్తి చేయించడం అభినందనీయమన్నారు. ముగ్గురు సీఎంలు, కేంద్రమంత్రి ఒకే వేదికపైకి రావడం సరికొత్త అంతర్రాష్ట్ర సఖ్యతకు సంకేతమని, ఇది మున్ముందు కూడా ఇలాగే కొనసాగుతుందని చంద్రబాబు స్పష్టం చేశారు.