సాయి కృష్ణ మిస్సింగ్ కేసులో సంచలనం.. సీఐ నాగరాజు అరెస్ట్

దిశ, వెబ్ డెస్క్: ఆంధ్రప్రదేశ్ రాష్ట్ర వ్యాప్తంగా తీవ్ర కలకలం రేపుతున్న 'సాయి కృష్ణ' మిస్సింగ్ కేసు దర్యాప్తులో కీలక పరిణామం చోటు చేసుకుంది. ఈ కేసును ప్రతిష్టాత్మకంగా తీసుకున్న ప్రభుత్వం.. విచారణను వేగవంతం చేసేందుకు ప్రత్యేక విచారణ బృందాన్ని (SIT) ఏర్పాటు చేసిన సంగతి తెలిసిందే. ఈ క్రమంలోనే మంగళవారం సిట్ అధికారులు ఒక సంచలన నిర్ణయం తీసుకుంటూ.. ఈ కేసులో ప్రధాన ఆరోపణలు ఎదుర్కొంటున్న సర్కిల్ ఇన్‌స్పెక్టర్ (CI) నాగరాజును అధికారికంగా అదుపులోకి తీసుకున్నారు. సాయి కృష్ణ అదృశ్యం వెనుక ఉన్న అసలు రహస్యాలను, ఆర్థిక లావాదేవీల కోణాలను రాబట్టేందుకు సిట్ అధికారులు సీఐ నాగరాజును ప్రత్యేక వాహనంలో కట్టుదిట్టమైన భద్రత నడుమ విచారణ నిమిత్తం స్థానిక పోలీస్ గెస్ట్ హౌజ్‌కు తరలించారు.

సీఐ ఇంటి వద్ద తీవ్ర ఉద్రిక్తత

సీఐ నాగరాజును సిట్ అధికారులు అదుపులోకి తీసుకుంటున్నారనే సమాచారం బయటకు రావడంతో ఆయన నివాసం వద్ద ఒక్కసారిగా ఉద్రిక్త వాతావరణం నెలకొంది. నాగరాజుకు మద్దతుగా ఆయన అభిమానులు, అనుచరులు, స్థానికులు పెద్ద సంఖ్యలో అక్కడికి చేరుకుని గుమిగూడారు. దీంతో సిట్ అధికారుల చర్యలకు వారు అడ్డు తగలకుండా ఉండేందుకు ఉన్నతాధికారులు ముందస్తు జాగ్రత్తగా భారీగా పోలీసు బలగాలను మోహరించారు. తీవ్ర నినాదాల నడుమ పోలీసులు నిరసనకారులను చెల్లాచెదురు చేశారు. అనంతరం భారీ బందోబస్తు మధ్య సీఐ నాగరాజును సిట్ అధికారులు అరెస్ట్ చేసి తీసుకెళ్లారు. ఈ పరిణామంతో ఏపీ పోలీస్ శాఖతో పాటు రాజకీయ వర్గాల్లోనూ ఈ కేసు తీవ్ర సంచలనంగా మారింది.