జ్యూస్ ఫ్యాక్టరీలపై చిత్తూరు మామిడి రైతుల ఆగ్రహం

దిశ, వెబ్ డెస్క్ : చిత్తూరు జిల్లాలో మామిడి రైతులు (Chittoor Mango Farmers) తీవ్ర ఆగ్రహం వ్యక్తం చేస్తూ నిరసన బాట పట్టారు. జిల్లా వ్యాప్తంగా ఉన్న పలు జ్యూస్ ఫ్యాక్టరీలు (Juice Factories), గుజ్జు (Pulp) పరిశ్రమలు రైతులకు చెల్లించాల్సిన సుమారు రూ. 360 కోట్ల బకాయిలను నెలల తరబడి పెండింగ్‌లో పెట్టడమే ఇందుకు ప్రధాన కారణంగా వారు పేర్కొంటున్నారు. గత సీజన్‌లో ప్రభుత్వం ప్రకటించిన మద్దతు ధర ప్రకారం, ఫ్యాక్టరీ యజమానులు కిలో మామిడికి రూ. 8 చెల్లించాల్సి ఉండగా కేవలం రూ. 4 మాత్రమే ఇస్తుండటంతో అన్నదాతలైన తాము తీవ్రంగా నష్టపోతున్నామని ఆవేదన వ్యక్తం చేస్తున్నారు. ఈ మోసాన్ని నిరసిస్తూ గుడిపాల వంటి ప్రాంతాల్లోని జ్యూస్ ఫ్యాక్టరీల గేట్లకు సోమవారం తాళాలు వేసి బైఠాయించారు. తమ కష్టార్జితం తమకు అందే వరకు బకాయిలు పూర్తిస్థాయిలో చెల్లించే వరకు ఫ్యాక్టరీలను తెరిచే ప్రసక్తే లేదని రైతులు హెచ్చరిస్తున్నారు. అయితే తాళాలను తహశీల్దార్ కు రైతులు అప్పగించారు.

​మరోవైపు, ప్రభుత్వం తరపున అందాల్సిన రూ. 4 సబ్సిడీ కొంతవరకు రైతుల ఖాతాల్లో జమ అయినప్పటికీ, ఫ్యాక్టరీల నుంచి రావాల్సిన మెజారిటీ వాటా రాకపోవడంతో రైతులు అప్పుల ఊబిలో కూరుకుపోతున్నామని చెబుతున్నారు. ఇప్పటికే జిల్లా కలెక్టరేట్ వద్ద కూడా చలో కలెక్టర్ ఆఫీస్ పేరుతో భారీ నిరసన ప్రదర్శనలు జరిగిన విషయాన్ని గుర్తు చేస్తున్నారు. పొరుగు రాష్ట్రాలైన కర్ణాటక, తమిళనాడులో ధరల తరుగుదలను సాకుగా చూపుతూ ఇక్కడి ఫ్యాక్టరీ యజమానులు తమను నిలువునా ముంచుతున్నారని రైతులు ఆవేదన గురవుతున్నారు. కొత్త సాగు సీజన్ ప్రారంభమవుతున్న తరుణంలో, ఎరువులు, ఇతర పెట్టుబడులకు డబ్బు లేక ఇబ్బంది పడుతున్నామని, వెంటనే ప్రభుత్వం జోక్యం చేసుకుని ఫ్యాక్టరీల నుంచి బకాయిలు వసూలు చేయించాలని వారు ప్రభుత్వాన్ని డిమాండ్ చేస్తున్నారు.